ineqarfiit
Paamiuni kollegia nutaaq
Kommuneqarfik Sermersooq maannakkut Paamiuni kollegiani inissanik neqerooruteqarsinnaalerpoq
Septembarip aallaqqaataanniit Paamiuni inuusuttut arfinillit ilinniartut illoqarfimmi kollegianut nutaanut nuussinnaalissapput.
Inuusuttut Piareersarfimmeersut – kommunimi ilitsersuisarfik pikkorissaavillu – aasap ingerlanerani illumik iluarsaasseqataasimapput pilerinarninngortissimallugulu.
Pequtit nutaat
Nutaanik natersualersugaavoq, pequtit nutaat, igaffimmi atortut aamma iikkat qalipanneqarsimapput.
Kollegia niviarsiaqqat nukappiaqqallu immikkoortillugit avitaavoq. Immikkoortortat tamarmik immikkut pingasunik inimik isersimaartarfittalimmik, igaffimmik aamma immikkut uffarfimmik perusuersartarfimmillu ineerartaqarput.
Illoqarfimmi Imarsiornermik Ilinniarfimmit illu Kirkegårdsvejimiittoq siunertamut attartortinneqarpoq, maannakkullu initaarniarlutik qinnuteqaateqartorpassuanngoreerput.
Atuaruk: Ivigaasaaqqanik arsaattarfik nutaaq atoqqaarfissiorneqartoq
Inuusuttut arfinillit taakku kollgeami ikioqatigiillutik nerisassiortarneq, nereqatigiittarneq, eqqiaasarnerit aamma nalinginnaasumik pissusilersorneq kiisalu ulluinnarni suliassanik suliakkiisarnerit pillugit namminneq illumi malittarisassiussasut isumaavoq. Malittarisassat pingaarnerit KAF-imit (Kollegie Administrations Fælleskontor) aamma Piareersarfimmi suliaapput.
Piareersarfik akiliissaaq
- Paamiuni nutaamik kollegiartaarnerput inuusuttullu tassunga nuussinnaanerat nuannaarutigaarput. Tamanna Paamiuni inuusuttunut ilinniagaqartunut, aammali inuusuttunut Arsummeersunut periarfissaavoq nutaaq. Piffissami sivisujaami Arsummi Paamiunilu inuusuttut kollegiami inissaannik pisariaqartitsisimapput, Malene Lynge, Isumaginninnermut, Suliffeqarnermut Inuussutissarsiornermullu Ataatsimiititami siulittaasoq oqarpoq.
Kollegia Piareersarfimmi nammineq killiliussat iluanni aningaasaliiffigineqassapput. Kollegiep inissisimaffigaa: B-961 Kirkegårdsvej. Inuusuttut ilinniartut 18-ileersimasut Paamiuni Piareersarfik aqqutigalugu qinnuteqaateqarsinnaapput.
Paamiut pillugu allaaserisat takukkit