Paarisa: Atoqateqartarnikkut peqqissuuneq kikkunnit tamanit ukkatarineqarli
Sapaatip akunnerata arferngat aallarteqqammerpoq, taamaattumik Paarisa atoqateqartarnikkut peqqissuuneq pillugu quppersagaaqqanik filminillu naammassinnissimavoq. Taakkua ilaatigut killissanut, aaqartarnermut, naartunaveersaatinut aamma atoqatigiinnermut tunngapput. Paarisa angajoqqaanut quppersakkanik suliaqarsimavoq ajornaanerusumik atoqateqartarneq pillugu meeqqaminnut oqaloqatigiissutigisinnaaniassagamikku.
Qaqugukkut aaqalertoqartarpa aamma qanoq imminut allanullu illersortoqarsinnaava kinguaassiutitigut nappaatit eqqarsaatigalugit?
Paarisap sapaatit akunnerisa arfernani angajoqqaat kikkullu tamaasa atoqateqartarnikkut peqqissuuneq pillugu ukkatarinninnissaat kaammattuutigaat. Paarisa filmiliaaqqanik pingasunik suliaqarsimavoq taakkualu ilaatigut killissanut, aaqartarnermut, naartunaveersaatinut atoqateqartarnermullu sammipput.
- Filmini qanoq imminut paarisinnaanermut allallu paarisinnaanerannut ilaatigullu naartunaveersaatit atorneqartarnerannut tunngatillugu inuusuttut ilisimasanik tuninissaat siunertarineqarpoq. Naalakkersuisut tusagassiuutinut nalunaaruminni allapput.
Angajoqqaat meeqqaminnut oqaloqatiginnittassapput
Filmit pingasut saniatigut Paarisa quppersakkanik marlunnik suliaqarpoq. Meeqqat 1.-3. klassini aamma 4.-6. klassini atuartut angajoqqaavinut sammititanik quppersagaaqqat marluk saqqummiunneqassapput. Timi, misigissutsit, killissat allallu kinguaassiutitigut tunngassuteqartut pillugit angajoqqaat meerartik oqaloqatigisinnaanissaanut quppersagaaqqat taakkua sakkussaannik tunisissapput.
- Quppersagaaqqat taakku atorlugit angajoqqaat peqataalernissaat sammisanullu oqaluuserissallugit ajornakusoorsinnaasunut tunngatillugu ammanerulersitsissasut Paarisap kissaatigaa, Paarisa paasissutissiivoq.
Aammattaaq Paarisap pitsaaliuinermik siunnersortit arlallit attavigisimavai, taakkuttaaq nunami sumiiffinni arlalinni pissanganartunik sammisassaqartitsiniarput.
- Sammisassanut taakkununnga pissanganartunut atortussanik inniminniisoqarnikuuvoq, taakku nunap kommuniinut tamanut nassiunneqassapput.
Suliniutit taakku atorlugit innuttaasut siammasissumik anguneqassasut Paarisap neriuutigaa.
- Sammisassaqartitsinerillu taakku aqqutigalugit peqqinnartumik atoqateqartarneq pillugu oqallinnernik eqqarsaatersuutiginninnernillu aallartitsisoqassasoq aamma sammisap iluani ilisimasanik annertunerusumik ujartuisoqarnissaanut pissutissaqartitsilersinnaasoq neriuutigaarput.
Filmit ilaat uani ataani takuuk: