Birna Bjránsdóttir
Paarnaarussineq sapaatip-akunnerinik sisamanik sivitsorneqartoq
Reykjavikimi eqqartuussiviup angutip Birna Brjánsdóttirimut toqutsisimasutut pasineqarluni tigummineqartup paarnaarussaaqqanera sivitsoqqammerpaa.
Birna Brjánsdóttirip toqunneqarneranut angut pasineqartoq, suli sapaatip-akunnerini sisamani tigummigallarneqarluni paarnaarussaaqqassaaq. Mbl.is taama allappoq.
Eqqartuussiviup maannamut angut sapaatip-akunneri marlukkaarlugit tigummigallarneqartussanngortaraluarpaa, kisianni maanna politiit sapaatip-akunnerini sisamani piumasaqarnerat akuerineqarpoq.
Birna Brjánsdóttirip toquneranut akisussaasuuneranik tulluartumik pasineqarnerata eqqartuussivimmit nalilerneqarnera tunngavigalugu sivitsuineq pivoq.
Taamaattumik eqqartuussinerup aallartinnissaata tungaanut tigummigallarneqarluni paarnaarussaaqqanissaa naapertuulluartuusoq nalilerneqarpoq.
Pasineqartulli arnaq taanna inuusuttoq toqussimannginnerarlugu aalajangiusimaannarpoq.
Atuaruk: Birnamut pasisaq kisimiititaalluni paarnaarussaaqqajunnaartoq
Piffissap sivikitsup ingerlanerani paasiniaaneq naammassissallugu naatsorsuutigigitsik, oolitiit oqaaseqartartuat Jón H. B. Sorrason mbl.is-mut oqarpoq.
Tamatuma kingorna suliaq unnerluussisussaatitaasunut ingerlateqqinneqassaaq, taakkua unnerluussutaasussaq piareersassavaat.
Piffissaliunneqartoq malillugu tamanna sapaatip-akunneri arfinillit iluanni pissaaq.