Paarsaminik toqutsisoq ukiunik qulingiluanik pineqaatissinneqarpoq
Arnarsiap pineqaatissinneqarnini landsrettimut ingerlateqqippaa.
Eqqartuussiissut Nuummi Eqqartuussivimmi nalunaaqutaq ulloqeqqata qaangilaaraa nalunaarutigineqarpoq, eqqartuussisut eqqartuussiissut tamarmik isumaqatigiissutigaat.
Unnerluussisut piumasaqaataat, meeqqamik ataatsimik ukiulimmik toqutsisoq ukiuni qulingiluani pineqaatissinneqarsimasut inissiisarfianniitinneqassasoq eqqartuussisunit tusaaniarneqarpoq.
Eqqartuussisut ukiuni qulingiluani pineqaatissinneqarsimasut inissiisarfimmiititsinissamik aalajangernerat tunngaveqarpoq, 22-nik ukiullip niviarsiaqqap niaqua arlaleriarlugu natermut anaarlussaassimammagu niviarsiaqqap niaquata saarnga arlalinnik putullugu, kingorna meeqqap toqutsigisaanik.
Tunngavilersuutit ilagaat Retslægerådip (nakorsat siunersiorneqartartut) arnamik misissuinera naapertorlugu, arnaq 22-nik ukiulik iliuuseqarnermi nalaani niaqulaarsimanngilaq, pisorlu tamaat eqqaamasimagaa, naak nassuiaanermini oqarsimagaluartoq pisimasup ilaa eqqaamanagu.
Eqqartuussisut eqqartuussissummi pingaartillugu oqaatigaat meeraq pisortanit tassunga inissinneqarnikuusoq tatigigamikku niviarsiaqqamik paaqqinnillunilu ikiorfartuisussatut. Arnarsialli misigissutsiminik aqunneqarluni taama sakkortutigisumik meeqqamut persuttaasimasoq, naak niviarsiaraq imminut illersorsinnaanngikkaluartoq.
Eqqartuussissutip atuarneqarnerani saqqummerpoq, arnap 22-nik ukiullip meerarsiami ataatsimik ukiullip ajammani kamalersimalluni, niviarsiaraq nilliaffigalugu uluaatigut kiillugu aammalu niaqua natermut anarrussaallugu aallartissimalluni.
– Ilisimasussaavat meeqqap niaqua natermut anaarlussaakkukku tamanna toqqutigisinnaagaa. Taamaammat ukiuni qulingiluani pineqaatissinneqarsimasut inissiisarfianniissaatit, eqqartuussisoq oqarpoq.
Eqqartuusaassup illersuisuata piumasarigaluarpaa toqutsinermik unnerluussissut allanngortinneqassasoq toqumik kingunilimmik persuttaasimasunngortillugu taamaasillunili annerpaamik ukiunik arfineq-pingasunik pineqaatissinneqarsimasut inissiisarfianniittussanngortitsinermik kinguneqarsinnaasoq.
22-nik ukiulik ulluni 14-ini suli tigummisaagallassaaq, tassunga suliaq Landsrettimi suliarineqarnissaata tungaanut.