Paasisassaanngitsumik ersiuteqartoqarnerata akiuussutissamik misileraaneq unitsikkaa
AstraZenecap covid-19-imut akiuussutissamik misileraanera unitsikkallarneqarsimavoq.
Akiuussutissap inunnut coronavirusimut illersuisussap ineriartortinneqarnerata qanittukkut iluatsinneqarsinnaanera annikillisimavoq.
Covid-19-imut akiuussutissatut ilippanaateqarluartup misilerarneqarnera naggataatigut unitsikkallarneqarsimavoq. Tamanna pisimavoq Tuluit Nunaanni inuup misileraatigineqartup "paasisassaanngitsumik ersiuteqalersimanerata" malitsigisaanik.
Nakorsaasiorfimmi AstraZenecami Oxford University suleqqatigalugu akiuussutissamik ineriartortitsisup oqaaseqartartua taamatut ilisimatitsivoq.
- Paasissutissanik ileqquusutut misissuinermi, isumannaatsuuneranik misissuiniarluni akiuussutissamik misileraaneq unitsinneqarto, nutaarsiassaqartitsivik Ruters naapertorlugu oqaaseqartartoq ilisimatitsisimavoq.
Inuup misileraaffigineqartup tigussaasumik ersiuteqarnera pillugu ilisimatitsissuteqartoqarsimanngilaq. Pineqartorli iluarsissasoq naatsorsuutigineqartoq, pisoq pillugu ilisimasalik internetsikkut nutaarsiassaqartitsivimmut statnews.com-imut ilisimatitsisimavoq.
Isumaqatigiissut aqqutigalugu akiuussutissaq Kalaallit Nunaanni atorneqarsinnaasoq
EU-kommissionip ingerlatseqatigiiffimmut isumaqatigiissuteqarfigisimavaa, akiuussutissaq akuerineqassappat 300 millioninik annertussusilimmik pisiaqarnissaq. Danmarkimi peqqissutsimut ministerip Nunatsinnilu Nakorsaanerup siusinnerusukkut ilisimatitsissutiginikuuaat, akiuussutissaq naammassillugu ineritsinneqassappat, Kalaallit Nunaata akiuutissaq iluaqutigisinnaagaa.
Akiuussutissaq AstraZenecameersoq akiuussutissatut inaarutaasumik pingajussaanik misilerarneqarsimasut tallimat missaanniittut ilagat. AstraZenecali pingajussaanik misileraanermi siullersaalluni unitsinneqarsimavoq, statnews.com allappoq.
Nalinginnaasuunngilaq pingajussaanik misileraasoqarneranik unitsitsigallartarneq. Nakorsaatit nutaat inunnut tuusintilikkaanut misileraatigineqartarput, nakorsaatit sunniuteqarluarnersut paasiniarlugu aamma siunertarineqanngitsumik saniatigut sunniuteqannginnissaat qulakkeerniarlugu.
Tamatuma kingorna aatsaat akiuussutissap niuerutigineqalernissaanut akuersissummik oqartussanut qinnuteqartoqarsinnaavoq.