Paasissutissat inunnut ataasiakkaanut tunngasut pillugit kukkusoqarneratigut Danmarkimiit akiuussusernissamut aggersaasoqartoortoq
Nunatsinni innuttaasut arlallit Danmarkimi septemberimi novemberimilu akiuussusertinnissamut aggersarneqarsimapput. Tamanna kukkunerusoq, peqqinnissaqarfiup paasivaa.
Innuttaasut arlallit, Kalaallit Nunaanni najugaqartut, Danmarkimi akiuussuserneqarnissamut aggersarneqarsimapput. Nunatta Nakorsaaneqarfia nittartakkamini sisamanngornermi 16. december taama nalunaaruteqarpoq.
Nunatta nakorsaaneqarfia naapertorlugu aggersaanerit Statens Serum Institutimit nunatsinni innuttaasunut septemberimi aamma novemberimi nassiussimavai.
Tamanna paasissutissat inunnut ataasiakkaanut tunngasut pillugit isumannaallisaanerup unioqutinneqatsiarsimaneranit pisimasoq, peqqinnissaqarfimmit paasineqarpoq.
- SDanmarkimi Statens Serum Institutti innuttaasut kalaallit COVID-19-imut akiuussutissinneqarnissaannut qaaqqusivoq. Statens Serum Instituttip coronamut akiuussutissinneqarsimanermut uppernarsaammik (coronapas) kalaallinut innuttaasunut tunniussinissaanut atatillugu paasissutissanik atuinissamik isumaqatigiissummi pineqartut inuttut normui pigineqarput. Tamannali nunatsinni Peqqinnissaqarfimmit isumagineqareermat innuttaasut COVID-19 -imut akiuussutissinneqarnissamut Danmarkimi pisortanit qaaqquneqartussaanngikkaluarput, nunatta nakorsaaneqarfia allappoq.
Navianartorsiortitsinngilaq
Nunatta nakorsaaneqarfiata naliliivoq paasissutissanik ingerlatitseqqiineq innuttaasut pisinnaatitaaffiinik paasissutissanilluunniit navianartorsiortitsisimanngitsoq.
- Paasissutissanilli suliaqarneq innuttaasuni -qaaqqutinnerugaluamik ilaginnaannaaqqusani – anikitsumik kalluaasimavoq paatsiveerusimaartitsissimallunilu.
Nunatsinni peqqinnissaqarfiup innuttaasut akiuussusersornissaat akisussaaffigaa, periarfissallu pillugit nammineq nalunaaruteqartarluni.