oqallinneq
Paavi Fransi: Meeqqasi kaakkaangata milutsittarisigit
Paavip naalagiartitsinermi nalaani anaanaasut meeqqatik milutsittappatigit ajoriffissaqartinngilaa
Arnat meeqqatik kikkut tamarmik isersimaffigisinnaasaanni milutitsisarnerat assigiinngitsunik isumaqarfigineqarpoq. Tamanna pillugu aamma Nunatsinni oqallittoqangaatsiartareerpoq.
Katuullit ittuata paavi Fransi tamanna pillugu isummani naalagiartitsinermi nalaani anippaa. Meeqqanik 33-nik kuisitsinermi nalaani oqarpoq ajoriffissaqartinnagu anaanaasut meeqqatik milutsissagunikkit.
- Anaanaasusi, meeqqasi immuttortittarsigit kaakkaangata. Milutitsinissarsi ernumagisariaqanngilarsi, paavi Fransi naalagiartitsinermi nalaani taamatut oqarsimaneragaavoq.
Nuummi Hotel Hanse Egedemi sulisup arnaq piumaffigaa perusuersartarfimmi milutseqqullugu, tamanna annertuumik Nunatsinni oqallisaavoq februaarimi 2013-mi.
Taamaasiortoqareersoq anaanaasut hotellimi ingillutik akerliussutsimik takutitsipput. Anaanaasulli paavimi naalagiassagaluarunik ernummatissaqarnavianngillat.