Palerfissanngorpoq
Ulluni pingasuni qimusseraqatigiinneq Arctic Palerfik Ilulissani ingerlanneqassaaq sisamanngorneq aprilip 17-ianiit arfininngorneq aprilip 19-iata tungaanut.
Nalaatsornerinnaanngilaq qimusserartarnerup Arctic Palerfik-mik taaguuserneqarsimanera. Tassami april-ip qaammataani Ilulissani seqinnerajuttorujussuuvoq qaamanerlu apummit sakkortusarneqaraangat palernissaq aanaralaarsuusarpoq - allaami palerpallaartoqarsinnaalluni.
Ukiormanna Arctic Palerfiup ingerlanneqarnissaa aamma nalliuttorsiornerussaaq tassami ukiut qulissaa taanna ingerlanneqassammat.
– Qimussertartut aammalu ilaasut akornanni ataatsimuualaarneq qitiulluinnarpoq aaqqissuussami, aammalu pisussanik assigiinngitsunik aaqqissuussisoqarniarpoq, soorlu kalaallit pinnguaataat aammalu ittoqutit ningioqutillu kusanarneqqusaatsinneqassallutik. Taakku saniatigut sermimut qimusserartoqassaaq, kangerlummi aalisartoqarsinnaalluni aammalu aqissiliartoqarsinnaalluni, taama nalunaarpoq Ole Dorph peqatigiiffik sinnerlugu.
Arctic Palerfik peqatigiiffittut ingerlavoq ataatsimeersuarnerlu ingerlanneqartarpoq sermersuup sioraani.