Palle C: Atuarfik pillugu oqallinnermi peqataagitsi
Palle Christiansen, Naalakkersuisunut ilaasortaq anguniagaqarpoq: Kikkut tamarmik ilinniagaqarnissaminnut periarfissaqassapput. - Kikkut tamarmik isiginnaaginnarsinnaanngilaat amerlasuut meeqqat atuarfiat qimattarmassuk siunissamut pilersaaruteqaratik
- Tamattami meeqqat atuarfianut ilaavugut, taamaattumillu innuttaasut, angajoqqaat, ilinniartitsisut aamma suliffeqarnermik ingerlatsisut kaammattorumavakka suli ingerlaqqittumik oqallinnermi peqataaqqullugit, siunissarput – meeqqat atuarfiat - qanoq sanarfiniarneripput pillugu, Ilinniartitaanermut, Ilisimatusarnermut Nunanullu Avannarlernut Suleqateqarnermut Naalakkersuisoq, Palle Christiansen oqarpoq.
Inatsisartut Meeqqat Atuarfiat pillugu inatsisissatut siunnersuutaat Inatsisartuni siullermeerneqarpoq, Palle Christiansenip oqallinneq iluarisimaarpaa.
- Naatsorsuutigineqareersutut oqallinneq ersersitsivoq meeqqat atuarfeqarnerannut tunngasutigut Inatsisartut annertuumik soqutigisaqarnerannut, aammalu kommunit meeqqat atuarfeqarnerannik ingerlatsineranni pitsaasunik atugassaqartitsinissamik Inatsisartut kissaateqarnerannik. Ilinniartitaanermut Naalakkersuisutut qilanaaraara inatsisissatut siunnersuutip ingerlaqqittumik oqaluuserineqarnissaa. Inatsisissatut siunnersuummi pingaaruteqartutut ilaavoq atuartitsinermik ingerlatsinermi atuartunillu ataasiakkaanik siunnersuinermi ingerlatsiviit pioreersut akimorlugit sullissinerup ingerlanneqarsinnaalernissaa. Pisussaaffimmut tamatumunnga assersuutitut taaneqarsinnaavoq ”atuartut mappii” ”atuarfitsialaap ingerlanneqarnerani” atorneqartussatut pisussaaffinngornissaat, Palle Christiansen oqarpoq isumaqarlunilu, meeqqat tamarmik meeqqat atuarfianniit anisassasut atuarfiup kingorna sulerinissaminnut pilersaaruteqareerlutik.
Tamanna atuartut mappeqalerneranni siunnersuinerullu nukittorsarneqarnerani siunertaasut ilagaat. Isiginngitsuusaaginnarsinnaanngilarpummi, iliuuseqaratalu amerlaqisut meeqqat atuarfianniit anisarnerat inuunerminni ingerlaqqinnissaminnut tunngatillugu siunnersorneqaratik. Inuusuttuaqqat inuunerminni siunissaqartut pineqarput, uagullu angajoqqaatut, atuarfittut, suliffeqarnermik ingerlatsivittut inuiaqatigiittullu pisussaaffeqarpugut inuusuttuaqqat taakkua aqqutissaminni ikiorneqarnissaannut. Ilaatigullu atuartut mappii iluaqutigalugit meeqqat atuarfiannut tunngasumik inatsit ingerlaqqiffiusumik suliniuteqassaaq kinguaariinni kingornussat pitsaanngitsut piiarnissaannut, taamaaliornikkut meeqqat tamarmik pitsaanerusumik periarfissarsisinnaaqqullugit inuussutissarsiutitigut ilinniakkamik ingerlatsinissaannut, Palle Christiansen oqarpoq.