Palle EU pillugu: Kalaallit Nunaat peqataasariaqarpoq
– Pingaartumik nunamut Kalaallit Nunaattut ittumut. Taamaattumik EUp, aningaasaqarnikkut nukittuup suli qaninnerusumik suleqatiginissaa assigiinngitsorpassuartigut iluaqutaassaaq, Kalaallit Nunaatalu peqataanissaa illersornissakkuttaaq soqutigunaateqangitsoornavianngilaq, Palle Christiansen oqarpoq.
–Kalaallit Nunaat OLT-mik aaqqissuussineq aqqutigalugu EU-mi peqataareeraluarpoq, sulili qaninnerusumik suleqataasariaqaraluarpoq. Kalaallit Nunaat imminut oqartussaaffigisoq, siunissamilu namminiilersussaq immikkoorani, politikikkulli suleqateqarluni ingerlasariaqarpoq. EU-lu suleqatigissallugu naleqquttuuvoq, Demokraatineersoq Palle Christiansen blog-imi www.palle.gl-imi allappoq.
– Kalaallit Nunaata namminiilernissaa pillugu innuttaasunik taasisitsinissaq qanoq inerneqarumaarnersoq nalunanngiusareerpoq. Namminiilernissaq, namminersornerunerup allissutissaatut oqaatigineqarsinnaasoq akuerineqanngitsoornavianngilaq. Namminersorneruneq imminullu oqartussaaffigineqa assigiinngissuteqangaarnavianngillat, uangalu isumaqarpunga tamanna innuttaasut ulluinnarni annerusumik maluginavianngikkaat, Immaqa ilaasa atugaat pitsaanerulerumaarput allalli atugaat pitsaannginnerulersinnaallutik, Palle Christiansen allappoq.
– Immitsinnulli oqartussaaffilerutta nunanut allanut tunngasunik tigusinissarput allannguutaanerusussaavoq. Suliassaq annertooq akisoorlu, Kalaallit Nunaat politikikkut nunanut allanut kusanartumik akuleruttassappat eqqarsarluarnikkut politikikkullu ittannerulluinnarnikkut ingerlanneqartussaq.
– Oqarumasoqassaaq qallunaat naalagaaffeqatigiiffiannut ilaasortaaneq EU-milu ilaasortaaneq ajoqatigiiginnartut, taamaallaat attaveqarfigisaq Bruxellesiunersoq Københavniunersorluunniit assigiinngissutigiinnarlugit. Uangali taamatut isumaqanngilluinnarpunga. Uanga Kalaallit Nunaata naalagaaffeqatigiiffimmiissaanik illersuisuuvunga EU-mullu ilaasortaanissaq ajoqutaasussatut isiginngilara. Kalaallit Nunaat aningaasaqarnikkut, ilinniartitaanikkut, peqqinnissakkut il.il. iluaqutissarsisinnaavoq, taamaattumillu isdumaqarpunga tamakku EU-mut ilaasortaanikkut suli pitsaanerulersinnaasut.