Palle J.-p Air Greenland isornartorsiorpaa
Dette indlæg er udelukkende udtryk for kandidatens egen overbevisning. Sermitsiaq redigerer ikke i indholdet, men forbeholder sig ret til at fjerne indlæg.
Denne kandidat har ikke udfyldt personlig information!
Air Greenland saassuppaa
Tupigusoqalunga 25.3 Air Greenlandip pisortaata Michael Binzerip Sermitsiap webavisiani oqaaseqaatai atuarpakka!
Siullermik timmisartuussiviup matuneqarneranik uparuartunngilakka, tamanna niuernikkut iliuuseqarnerulluinnarmat selskabip namminerpiaq aalajangigassaaq. Avannaani nunap immikkoortuani sumunngarfimmut selskabimi siulittaasutut,a ammalu Ilulissani poltiikeritut sukkulluunniit tamanna uparuartornianngilara taamaasiorsimanngilangalu. Periuserli, ingerlatsivippassuarnut takornariaqarnermik inuuniutilinnut takornariallu pitsaasumik misigisaqartinniarugit aningaasarpassuarnik aningaasaliisimasunut atatillugu, isornartorsiorsimavara.
Ingerlatsiviit tamakkua Kaalallit Nunaata ussassaarutigineqarnerani annertuumik suliniuteqarsimapput. Ilaatigut tamatuma kingunerisaanik Air Greenland ilaasussaqartarpoq. Isumaqaruit namminneq kisimiillutik ilaasunut tunngavissanik pilersitsisarlutik, taava kukkusorujussuupput. Matumani pineqarluinnarpoq ataatsimoorluni iliuuseqarneq, tamannalu ataqqigunanngilaat.
Air Greenland attaveqariaaseqartariaqarpoq ingerlatsivinnik kommuninillu, angallannermi atortorissaatinik tamakkiisumik ingerlalluartunillu pisariaqartitsisunut, iluaqutaasumik. Ullumikkut tamatumunnga atugassaqanngippat taava misissortariaqarpoq tamakkua nassaarineqarsinnaanersut. Nalinginnaasumik tuniniaavik kiffartuussassaq attaveqarfigineqartarpoq, suut tamaasa ilanngunnissaat qulakkeerniarlugu. Air Greenlandimik tamanna misigineq ajorparput, tamannalu ilaanneeriarluni pakatsinartartorujussuuvoq.
Aamma oqaluuserisimanngilara air Greenlandip takornariaqarnermik ingerlatsisut tamaasa attaveqarfigissagai, nunalli immikkoortuani Sumunngarfimmut selskabeqarpat pissusissamisuussaaq tamakkua atussallugit. Michael Binzer oqarsimasoq issuarneqarmat attaveqarneq pillugu GTE (Kalaallit Nunaanni Takornariaqarnermik Inuussutissarsiornermillu Siunnersuisoqatigiit) isumaqatigiissuteqarfigineqarsimasoq, taava tamanna akisussaassutsimik qimarratiginninneruvoq!
Nuannaarutigalugu takusimavarput nuna tamakkerlugu politikerit ilaat oqartut nunap timmisartortitseqatigiiffiani sunik misissugassaqartoq. Neriuppugut tamanna isumaqartoq maanna Inatsisartuni Naalakkersuisunilu peqqissaarullugu oqaluuserineqassasoq qanoq isilluni qulakkeerneqarsinnaanersoq, innuttaasut takornariallu ullormi aallarusuffimminni timmisartumi inissaqarnissaat, tamanna aningaasarsiornikkut tunngavissaqarpat. Takornariaqarneq ukiuni kingullerni ineriartupiloorsimavoq, angallannermulli atortorissaativut siusinnerusumut sanilliullugu ajorseriarsimapput. Silarsuaq killormoortuuvoq tamannalu politikerit allanngortittariaqarpaat, ilaatigut nunap timmisartortitseqatigiiffiata aningaasarsiorfiusup aamma aningaasarsiortutut ingerlatsilerneratigut.
Annertuumik piginneqataapput sunniuteqarnertillu atortariaqarpaat, taavalu sullissinernik annertoorsuarnik pisisoqartarpoq sullissinermut isumaqatigiissutitigut.
Palle Jerimiassen
Destination Disko A/S
Siulittaasoq