Palle Naalakkersuisunit aamma tunuangajalerpa?
Palle Christiansen Demokraatini oqartussaassusikilliartorsimavoq partiimi siulittaasup tulliatut tunuarnermi kingorna
Inatsisartunut 2009-mi qinersinerup kingulliup kingorna Demokraatini siulittaasoq aamma siulittaasup tullia Naalakkersuisunullu ilaasortaanerup nassataanik Jens B. Frederiksen aamma Palle Christiansen nunatsinni politikkimi atorfiit qaffasinnersaannut pilerigineqartunullu inissipput.
Taamaattoq Palle Christiansenip sapaatip akunnerata naanerani Demokraatini siulittaasup tulliatut tunuarnerata kingorna Naalakkersuisunut ilaasortaajunnaassaaq, Inatsisartunut qinersinissami tullermi qinikkat aammaarlutik maannakkutut inississagaluarpata Demokraatinilu naalakkersuisunngortitassat toqqartorneqassagaluarpata.
Qinersinissami tullermi Demokraatit siuariassappata suullu assigiinngitsut partiimut naalakkersuisoqatigiinnullu ajunngitsumik kinguneqassagaluarpata, qinersinerup tulliup kingorna ilimananngilaq Palle Christiansen Naalakkersuisunut ilaasortanngoqqinnissaa.
Palle Christiansenip Naalakkersuisutut ullumi kisitaannanngornerat pillugu oqarpoq:
- Uanga isumaqarpunga uagut (Demokraatit aaqq.) qinersinermi tullermi siuariarluassasugut. Qinersinerup kingorna kikkut sumi issiassanersut tamanna uanga eqqissiivillunga tiguara.
- Qinersinerup tulliup kingorna illit Naalakkersuisunut ilaasortaanissat ilimanarpa?
- Naluara. Tamanna suli eqqarsaatersuutiginngilara. Uannut tamanna pingaaruteqanngilaq, Palle Christiansen Sermitsiaq.AG-mut naqissuserpaa.
Palle Christiansen ullumikkut ilinniartitaanermut, ilisimatusaarnermut nunanillu avannarlerni suleqatigiinnermut Naalakkersuisuuvoq.
Anda Uldumip Palle Christiansen paarlappaa maanna Demokraatini siulittaasup tullinngorluni, Michael Rosingip Ane Lone Bagger partiip aaqqissuussaanerani siulittaasup tulliatut issiaveqarsimasoq.