Pallep 56,4 millioner koruunit nassaariniassavai

– Suut tamarmik eqqorneqarsinnaapput, inernissaa kisiat pinnagu, aningaasaqarnermut naalakkersuisoq Palle Christiansen, Demokraatit, sermitsiaq.ag-mut oqarpoq.

Taamaattumik Palle Christiansen sapaatip akunnerata naanerani uani ulapippoq, tassa 2011-mut aningaasanut inatsisissatut siunnersuummi ingerlatsinermut sanaartornermullu aningaasartuutit maanna 56,4 millioner koruunik amigartooruteqarmata.

Siorna Palle Christiansenip "Putumiit 0-mut" ukioq mannalu "Atugarissaarnerup aningaasalerneqarnera" aningaasanut inatsisini tunngavittut atorpai, namminersorlutik oqartussat ingerlatsiviinut taarsigassarsisitsisoqarani oqimaaqatigiittussaq.

Aggustip 10-anni naalakkersuisut aningaasanut inatsisissatut siunnersuut 212 millioner koruuninik amigartoorutilik saqqummiuppaat. Siunnertuutikkut 213 millioner koruunit namminersorlutik oqartussat ingerlatsiviinut taarsigassarsiassatut immikkoortinneqarsimapput, siullerpaamik nukissamik pilersuiffiup Nukissiorfiit erngup nukinganik nukissiorfinnut aningaasaliissutissaatut. Ingerlatsineq sanaartornerlu kisiisa isigalugit aggustimi aningaasanut inatsisissatut siunnersuut 1 million koruuninik sinneqartooruteqarpoq.

Kingorna Naalakkersuisut aamma Aningaasanut Ataatsimiititaliaq allannguutissatut siunnersuuteqarput arlalinnik, katillutik landskarsimik 56,4 millioner koruuninik amigalersitsisunik.

Aningaasanut Ataatsimiititaliaq aappassaaneerneqarnissaanut isumaliutissiissummini allappoq naalakkersuisut pingaartilluaraat "aningaasanut inatsimmi aalajangersimasumik angusaqarnissaq".

Aningaasaqarnikkut akisussaassuseqarnissaq Aningaasanut Ataatsimiititaliap taperserpaa, tamannali peqatigalugu mianersoqqussutigalugu Palle Christiansenip aningaasanut inatsisip oqimaaqatigiinnissaa kisiat isiginiarpallaassanngikkaa: – Imminut napatittumik aningaasaqarnerup ineriartornerata siuarsarnissaa aamma isumagineqassaaq.

Inatsisartut 2011-mut aningaasanut inatsit ataasinngorpat ualikkut aappassaaniissavaat.