Paneeraq Olsen MIO-mut isumaqataasoq: Inuusuttut peqataatinneqassapput
Meeqqanut, Inuusuttunut Ilaqutariinnullu Naalakkersuisup imminut toqunnissamut pinaveersaartitsinermi periusissiasssap nutaap suliarineqarnerani inuusuttut peqataatinniarpai. Aamma inuit imminut toqunnissamik eqqarsaateqarsimasut inuillu imminnut toqoriarsimagaluartut peqataatinneqassallutik.
Meeqqat illersuisusata politikkerit inuusuttunut tusarnaartannginnerat qattutiivippaa. MIO inuusuttut ilisimasaannik katersiniarpoq, Naalakkersuisunut inassuteqaatinik nassiussinissaq siunertaralugu.
Meeqqat illersuisusat Meeqqanut, Inuusuttunut Ilaqutariinnullu Naalakkersuisumit Paneeraq Olsenimit taperserneqarpoq, taassuma erseqqissaassutigaa, Namminersorlutik Oqartussat imminut toqunnissamut pinaveersaartitsinermi periusissiasssaasa nutaap suliarineqarnerani kikkut tamaasa peqataatinniarlugit.
- Nukivut tamaasa atorlugit kikkut tamaasa peqataatinniassavagut. Inersimasut, inuusuttut, inuit imminut toqoriaraluarsimasut aamma inuit imminnut toqunnissamik eqqarsaateqartut peqataatinneqassapput. Naalakkersuisut suliassaq akuerissappassuk, pineqartut tamasa attaveqarfigalugit aallartissaagut, Meeqqanut, Inuusuttunut Ilaqutariinnullu Naalakkersuisoq Sermitsiaq.AG-mut oqarpoq.
2020-mi inuit 41-t imminnut toqussimapput, 120-llu imminnut toqoriaraluarsimallutik. Naalakkersuisut nalunaarummik saqqummiussinermikkut innuttaasunut attaveqarniassapput.
- Ikiortissanik amigaateqarnerput nalunaarutigissavartput, inuit namminneerlutik saaffiginninniassammata. Ilaatigut inuusuttut ornittagaat, atuarfiit, Majoriaq, ilinniartoqarfiit kommunillu attavigissavagut. Taamaaliornitsigut inunnit peqataatinneqarsimanngitsunit ilisimasanik pissarsisinnaassaagut, Paneeraq Olsen oqarpoq.
Naalakkersuisup nunami tamarmi inuit attaveqartitsisarnermik misilittagallit qanimut suleqatiginerisigut nunaqarfiit illoqarfiillu tamarmik tusaaneqarnissaat qulakkeerniarpaa.
Suliassaq kikkunnut tamanut oqimaattoq
Meeqqanut, Inuusuttunut Ilaqutariinnullu Naalakkersuisup erseqqissaassutigaa, suliassaq oqimaattorujussuummat tamanit aaqqiiffigineqartariaqartoq. Oqaluttuaraa, MIO novembarip 19-iani ataatsimeeqatigisimallugu, tassani MIO Namminersorlutillu Oqartussat suleqatigiinnerat aallartinneqareersimalluni.
- MIO-p suliniaqatigiiffiillu allat suleqatigiilluarnissaat naatsorsuutigaara. Ilaatigut aamma Kalaallit Nunaanni Unicefip suliniutinut pisortaa pissutsit ilaannik allannguerusuttorujussuaq ataatsimeeqatigisimavara. Taamaammat aamma pingaaruteqarluinnarpoq, inuit nunami imminut toquttoqartarneranik assigiinngitsutigut misissuisarsimasut peqataatinneqarnissaat, Paneeraq Olsen nassuiaavoq.
Naalakkersuisup erseqqissaassutigaa, Naalakkersuisut suleriusissamik imminut toqunnissamut pinaveersaartitsinermi periusissiamut aqqutissiuisussaq suliaralugu aallartereersimagaat.
Paasititsiniaasarnerat naammanngilluinnartut
Namminersorlutik Oqartussat imminut toqunnissamut pinaveersaartitsinermut paasititsiniaallunilu periusissiortarnermut ukiorpassuarni aningaasarpassuarnik atuisarsimapput. Imminulli toquttartut ikinnerulersinnissaannut tamanna naammanngilluinnarsimavoq, Naalakkersuisoq oqarpoq.
- Paasititsiniaasarnerit naammanngilluinnarput, naamerluinnaq. Imminut toqunnissamik eqqarsaateqartut angusariaqarpavut. Imminut toqunnissamik eqqarsaateqartut kommunimut saaffiginnittarunanngillat, inuusuttut ornittagaannukartarunarput imaluunniit timersorniarlutik timersortarfimmukartarunarput. Taamaammat inuusuttut anguniarlugit iliuuseqassaagut, Meeqqanut, Inuusuttunut Ilaqutariinnullu Naalakkersuisoq oqarpoq.