Parisimi isumaqatigiissut aamma COP27: Kalaallit Nunaat suli piumaataarpoq
Namminersorlutik Oqartussat Parisimi isumaqatigiissutip kinguneri qulaajarlugit suli piariinngillat, tamannalu pillugu nunami namminermi politikikkut isumaqatigiinnginnerit taamaattumilu suli utaqqititsipput.
Inatsisartut ukiaanerani ataatsimiinneranni imaluunniit Naalagaaffiit Peqatigiit qanittumi silap pissusia pillugu ataatsimeersuarnissaani Kalaallit Nunaata pisortatigoortumik isumaqatigiissummut ilanngutissanngilaq.
Naalagaaffiit Peqatigiit Egyptenimi illoqarfimmi takornariartarfissuarmi Sharm el-Sheikimi silap pissusia pillugu ataatsimeersuarnissaannut, COP27, sapaatip-akunneri marluujunnaartut taama inissisimasoqarpoq.
Aviisi AG taama allappoq.
Nunatta Parisimi isumaqatigiissummut ilanngunnissaa Naalakkersuisut siulittaasuata Múte Bourup Egedep (IA), Glasgowimi Skotlandimi nuannaaqaluni tamanut nalunaarutigineranit ukioq ataasiunngitsorluunniit qaangiussimalerpoq.
- Nunat issittumiittut silap kissakkiartuinnarneranik malunnaateqarfiunerpaat ilagaat, Naalakkersuisuniillu isumaqarpugut akisussaaffiup ilaanik kivitseqataasariaqarluta, Muté B. Egede tassunga atatillugu taama oqarpoq.
Tamatuma kingorna upernaakkut ataatsimiittoqarnerani Naalakkersuisut Kalaallit Nunaata Parisimi isumaqatigiissummut ilanngunnissaa suliassanngortissallugu pilersaatigigaluarpaat. Politikikkut pissuteqartumik ukiaanerani ataatsimiittoqarnerani suliassanngortinneqarpoq.
Immikkoortorlu maanna politikikkut suliarineqarnissamut suli piareersimanngitsoq, Namminersorlutik Oqartussat oqarput.
Taamaattumillu Naalakkersuisunit ilaasortanit qaffasissumik inissisimasunit Naalagaaffiit Peqatigiit silap pissusia pillugu Egyptenimi ataatsimeersuarnissaannut tikittoqarnissaa ilimananngilaq. Namminersorlutik Oqartussalli atorfilittanik marlunnik aallartitaqassasut, Manasse Berthelsen, Kalistat Lundimut (IA) Nunalerinermut, Imminut Pilersornermut, Nukissiutinut Avatangiisinullu Naalakkersuisumut allatsi ilisimatitsivoq.
Aviisimi AG-mi atuarnerusinnaavutit. Aviisi uani pissarsiariuk: