Partii Inuit Inatsisartunut piareerpoq
Nunatsinni partii nutaajunerpaaq Partii Inuit, Inatsisartunut qinersinissamut peqataanissaminut inatsisartunit akuerineqassaguni, partii qinersinissamut piareersimavoq
- Inatsisartunut qinersinermi peqataasinnaanissatsinnut Inatsisartunit akineqarnissarput suli utaqqivarput. Annertuumilli sulissutigisimavarput suut qineqqusaarutigissanerlutigit. Oqarsinnaavungali qinersinissamut piareersimasugut.
Partii Inuit siulittaasua Nikku Olsen Sermitsiaq.AG-mut taamatut oqarpoq.
Partii Inuit-mi siulersuisut sapaatip akunnerani kingullermi inissititerneqarput taamaasillunilu partinngorluni akuerineqartoq.
- Tallimanngorpat tusagassiortunik katersortitsissaagut parteerput, angunigai pingaartitaalu ilisaritissallugit, Nikku Olsen oqaluttuarpoq.
Atuaruk ”Marsip 12-anni qinersissaagut?”
Atuaruk ”Aleqa: Siumut qinersinissamut piareersimavoq”
Qaqugu qinersinissaq suli nalunarpoq
Inatsisartunut qinersinissamut, suli ullulerneqarsimanngitsumut, partiip ilisaritinnissaa angumerineqarsinnaanersoq suli qularnartoqarpoq.
- Qularnaarlugu oqaatigisinnaanngilarput qineqqusaarnermi peqataasinnaanerluta. Peqataanissarpulli anguniarparput sulissutigalugulu, Nikku Olsen erseqqissaavoq.
Tusatsiakkat malillugit sisamanngorpat ulluaakkut qinersinissaq nalunaarutigineqassappat, qinersinissaq siusinnerpaamik pisinnaavoq marlunngornermi marsip 12-anni, tassa qinersinissaq sivikinnerpaamik sapaatit akunnerinik tallimanik sioqqullugu nalunaarutigineqartussaammat marlunngornikkullu ingerlanneqartussaalluni.
Atuaruk ”Demokraatit: Qinersinissamut tamatigut piareersimasarpugut”