Uro i Siumut
Partii Inuit naalakkersuisooqatigiit suleqatigiunnaarpaat
Naalakkersuisooqatigiit ataasiinnarmik maanna Inatsisartuni amerlanerussuteqalerput taaseqatigiittarnermut Partii Inuit naalakkersuisooqatigiinnik suleqateqarneq kipitimmassuk
Naalakkersuisooqatigiit maanna Inatsisartut ilaasortat 16-it tunulequtaraat illuatungiliuttut 15-nik tunulequtaqartut. Naalakkersuisooqatigiit amerlanerussuteqarnerat qajannarnerulerpoq Partii Inuit naalakkersuisooqatigiinnik suleqateqarnerik unitsimmassuk, KNR allappoq.
Partii Inuit siulittaasuat marlunngornermi nangaalereerpoq naalakkersuisooqatigiinnut inatsisartuni tunulequtaaginnassanerlutik. Partii Inuit naammagiunnaarpaat innuttaasut qulaatiinnarlugit aalajangertoqartarnera.
Partii Inuit aamma isertuutinngilaat naalakkersuisooqatigiit taaseqatigiittarneq pillugu Demokraatinik suleqateqarnerat, Partii Inuit isumaat malillugu Demokraatit tatiginanngitsumik pissusilersormata.
Partii Inuit suli patseqqapput
Partii Inuit suli mamaagusuutigaat siornatigut ineqarnermut avatangiisinullu naalakkersuisup Miiti Lyngep Partii Inunneersup oqartussaaffii naalakkersuisoqarfinnut marlunnut avinneqarnerat Kim Kielsen Siumumeersoq aamma Atassummeersoq Siverth K. Heilmann naalakkersuisuni ilaasortanngortinneqarmata.
- Tamanna Kim Kielsenimut nipangersaataannaasvoq Siumukkunni eqqissisoqarniassammat. Taamatulli aaqqiineq inuiaqatigiinnut akisoorujussuuvoq akuersaaginnarneqarsinnaanngitsoq, Nikku Olsen Sermitsiaq.AG-mut oqarpoq.
Naalakkersuisuni oktoberimi anisitaapput
Partii Inuit oktoberip 23-at 2013-mi sakkortuumik pineqarput. Tassani naalakkersuisut siulittaasuata Aleqa Hammonndip Siumumeersup Partii Inuit naalakkersuisooqataajunnaarsippai. Taama pisoqarneranut pissutaavoq oqallisaaqisoq uranimut naaggaarluinnarsimanerup atorunnaarsinnissaa maanna Partii Inuit tapersernianngimmassuk.
Inatsisartuni marluk ataasiinngorput
Randi Broberg ullumikkut Partii Inuit sinnerlugit Inatsisartuni ilaasortaavoq.
2013-mi martsimi partii taanna marlunnik qinigaatitaqaraluarpoq, qinigaatitaalli ataasiinnanngorpoq Lars P. Mathæussen septemberimi Siumumut nuummat.
Lars Mathæussen inatsisartunut qinersinermi 143-nit taaguunneqartoq taamanikkut oqaaseqarumanngilaq partiimut allammut nuunnini pillugu.
Atuaruk: Partii Inuit naalakkersuisooqatigiit qularilerpaat