Partiimut ilaasortaasimasut partiinut tapiissuteqartarneq sukanganerusumik malittarisassaliorneqarnissaa piumasarigaat
Pisortat partiinut tapiissutaasa sunut atorneqarsinnaanerat pillugu sukanganerusunik malittarisassaliortoqartariaqarpoq. Suleqatigiissitsisut pillugit suiap tamanna takutipaa, partiimi ilaasortaasimasoq isumaqarpoq.
Pisortat aningaasaataannit tapiissutigineqartartut assersuutigalugu politikkerit kiinarissartinneqarnerannut katsorsartinneqarnerannullu aningaasat tuusintilikkaat atorneqarsinnaanerat naleqquppa.
Naamik, Suleqatigiissitsisuni ilaasortaasimasut tallimat taamatut isumaqarput. Taakku partiip 2020-mut naatsorsuutai saqqummiunneqarmata akerliullutik allagaqarsimapput. Naatsorsuutini atuarneqarsinnaavoq, partiip siulitaasuanut Tillie Martinussenimut unnerluussut politiit taamaatissimagaat, partiip siulittaasua pisortat aningaasaataannik atornerluisimasutut, naatsorsuutinik allannguisimasutut unnerluutigineqarsimavoq, aamma akileraartarnermi oqartussat partiimut tunngatillugu iliuuseqarsinnaasimanngillat.
Suliap takutippaa, partiinut tapiissutinikatuinissamut malittarisassat sakkukippallaartut, partiimi ilaasortaasimasut taamatut isumaqarput:
- Sukanganerusunik malittarisassaliortoqartariaqapoq aamma pisortat aningaasaataannik atornerluineq pillaatissiissutitaqartariaqarpoq, taakku allapput.
"Aqqusinikkut angallannermut malittarisassat assigalugit"
Allakkamut atsiorsimasut tassaapput Flemming Nielsen, Liv Molich, Michael Rosing, Mathias Laurits Mathiasen aamma Jan Joe Seidsen.
Suleqatigiissitsisunik pilersitseqataasimasup Jan Joe Seidsenip isornartorsiuinertik Sermitsiaq.AG-mut imatut itisilerlugu oqaatigaa:
- Politikkerit pisortat aningaasaataasa sumut atorneqarsinnaanerat pillugu namminneq naliliinissamut ilikkarsimanngippata, taava malittarisassaqartariaqarpoq. Soorlu aqqusinikkut angallannermi malittarisassaqartoq. Kikkut tamarmik ajunngitsumik ingerlatsisartuuppata malittarisassat pisariaqassanngikkaluarput, kikkulli tamarmik ajungitsumik ingerlatsineq ajorput, Jan Joe Seidsen oqarpoq.
Taassuma Namminersorlutik Oqartussani kommuninilu atorfillit pisortat aningaasaataannik atuissappata malittarisassaqarlunilu aalajangersimasumik ingerlatseriaaseqartoqartoq assersuutigaa:
Partiit allat kaammattorneqartut
- Atorfillit, assersuutigalugu naalakkersuisoqarfinni pisortat aningaasat sumut atorsinnaaneraat pillugu malittarisassaqarpoq. Sooq partiinut tapiissutit sumut atorneqarsinnaanerat pillugu taamatut malittarisassaliortoqarsimanngila, Jan Joe Seidsen aperivoq.
Taanna Suleqatigiissitsisuni ilaasortaasimavoq, arlaleriarlunilu partiimi naatsorsuusiortuusimalluni. Taanna isumaqarpoq, Inatsisartuni partiit allat saqqummerlutik pineqartumut malittarisassaliornissaat piffissanngortoq.
- Suliaq manna pingaarutilippassuarnik imaqarpoq. Aningaasat atorfissarinngisaannut atorneqartarsimapput. Partiit allat saqqummertariaqalerput malittarisassaliorlutillu. Suleqatigiissitsisunimi pisimasoq partiini allani aamma pisimasinnaavoq, tassa tamanut saqqummiunneqarsimanngitsumik.
- Nukissiorfiit pisortaanerat kiinarissartinnissamut akiliuteqarsimappat, ingerlaannartumik tunuartinneqarsimassagaluarpoq. Tamanna aamma politikkerinut atuuttariaqarpoq, Jan Joe Seidsen oqarpoq.
Aningaasat nammineq inuttut atugassanut atorneqarsimasut
Partiip isertitai tamarmik pisortat tapiissutaanneersuusanngillat. Suleqatigiissitsisulli isertitaasa annersaat partiimut tapiissutineersuusut, partiip naatsorsuutaani takuneqarsinnaavoq.
Jan Joe Seidsenip tassunga atatillugu ilungersunartutut isigaa, Suleqatigiissitsisunit ilisimatitsissutigineqarsimammat, partiimi naatsorsuutit tukattut pillugit suliamut atatillugu eqqartuussissuserisunut kukkunersiuisartunullu 500.000 koruunit missaanniittut atorneqarsimasut.
- Tillie Martinussen inuttut politiinut unnerluutigineqarsimavoq. Suleqatigiissitsisuunngitsut. Partiip aningaasaatai siulittaasup nammineq inuttut pisariaqartitaanut atorneqarsimapput, Jan Joe Seidsen oqarpoq.
Suleqatigiissitsisut siulersuisui 2020-mut naatsorsuutini, sapaatip-akunnerata siuliani saqqummiunneqartuni allapput, Tillie Martinussenip atuisimanera pillugu suliami ilaasortaasimasut mamarliiniarsimasut.
Suut tamarmik malittarisassat malillugit ingerlanneqarsimapput, miliuunillu affai partiip aningaasaqarnerata iluarsaanneqarneranut atorneqarsimallutik:
- Nuannaarutigalugu naammagisimaarluguu oqaatigisinnaavarput, suliat assigiinngitsut akileraartarnermut oqartussanit, eqqartuussivinnit politiinillu ingerlanneqarsimasut maanna naammassineqartut, erseqqissumillu paasinarsivoq, unnerluussutigineqarsimasut oqartussanit peqqussuteqartoqarnissaanut tunngavissiisimanngitsut, partiimi siulersuisut naatsorsuutini nalunaaruteqarlutik allapput.