Partiit Inatsisartunut qinersisinnaatitaanermut malittarisassanik allanngortitsisinnaaneq pillugu apeqqummi isumaqatigiinngitsut

Naalagaaffimmi innuttaassuseqartut naalagaaffeqatigiinnit allanit nuuttut Nunatsinni ukiup affaani najugaqareerlutik Inatsisartunut qinersisinnaatitaalertarnerat naammaginarpa?

Apeqqut tamanna Doris J. Jensenip (S) apeqquteqaat aallaavigalugu oqallissaarutitut taallugu Inatsisartuni marlunngornermi oqaluuserisassanngortissimavaa.

Partiit ilaat apeqqummut naameerput, aamma naalagaaffimmi innuttaassuseqalernissamut danskit malittarisassaat oqallittoqarnerani erseqqissaassutigineqarput, tassani innersuussutigalugu, Danmarki malittarisassanik taamatut ittunik atuutsitsilersinnaappat, naalagaaffimmi innuttaassusillit naalagaaffeqatigiinnit allanit nunanillu allaneersut Inatsisartunut qaqugukkut qinersisinnaatitaalernissaannut Nunatta arlalinnik piumasaqaateqalersinnaanera naapertuutissasoq.

Partiimi naalakkersuisuutitaqartumi Siumumi oqaaseqartartoq Kuno Fencker oqarpoq, Nunatsinnut nuuttartorpassuit piffissami sivikitsuinnarni suliartorlutik nuuttartut, nunami maani najugaqalivinnissartik siunertarinagu:

- Innuttaassuseqalernissamik pilersaaruteqanngitsut

- Ullumikkut nunatsiniinnikuunngisaannartoq, oqaatsitsinnik ilinniarnikuunngitsoq ilinniassamaanngitsorlu, aallaqqiliivissoq allaallu nunaqqataarusunngitsoq, nunatta siunissaanut aalajangeeqataasinnaavoq aamma Inatsisartunut qinersisinnaallunilu Naalagaaffinngornissatsinnut taaseqataaratarsinnaavoq. Tassani Danmarkip naalagaaffiani innuttaassuseqarnissaq ukiullu affaani Nunatsinni najugaqarsimanissaq piumasaqaatituaavoq. Tamanna annikippallaanngila?

- Taamaammat Siumumi isumaqarpugut qinersisinnaatitaalertinnani Inatsisartunullu qineqqusaalertinnani minnerpaamik ukiuni marlunni Nunatsinni najugaqarsimasariaqartoq, Kuno Fencker oqaluttarfimmit oqarpoq.

Siumumi politikkerip nunanit allaneersut naalagaaffimmi innuttaassuseqalernissaannut Folketingimullu qinersisinnaatitaalernissaannut danskit malittarisassaat innersuussutigai. Fenckerip erseqqissaassutigaa, danskit naalagaaffianni innuttaassuseqalissagaanni Danmarkimi ukiuni qulingiluani najugaqarsimasuusariaqartoq, pinerluuteqarsimanngittariaqartoq, suliffeqartoqartariaqartoq oqaatsinillu ilikkarsimasariaqarluni.

- Innuttaminnut illersuisutut imminnut isigipput. Uagut aamma taamatut iliorsinnaavugut.

Naleraq: Nuuttorpassuit allannguisinnaapput

- Taamaammat Siumumit piumasaraarput Inatsisartunut qinersisinnaassagaanni Nunatsinni ukiuni marlunni najugaqarsimanissaq, Kuno Fenckeri apeqqummut pineqartumut Savalimmiu Danmarkilu qanoq isumaqarnersut tusarniaaffigineqartariaqanngitsut isumaqartoq oqarpoq.

Naleqqameersoq Jens Napãtôk oqallittoqarmat inuiaassuseqarneq pillugu apeqqummik qaqitsivoq, tamannalu oqallittoqarnerani qitiutineqalerluni. Naleqqamimmi periarfissat arlallit atorlugit kikkut kalaaliunersut erseqqissumik nassuiaqquneqartarsimavoq.

Ullumikkut kalaallit Danmarkip naalagaaffianni innuttaasuupput, isumaqatigiissutigineqartariaqarporlu kikkut imminnut kalaallisut taasinnaanersut, Naleqqamit oqaatigineqarpoq:

- Ernummatigineqarsinnaavoq pissutsinik allannguisinnaasunik nuuttorpassuaqarnissaa, taamaalillutalu ikinnerussuteqalerluta.

IA-mit Tunngaviusumik Inatsisissaq pillugu Isumalioqatigiissitaq innersuussutigineqartoq

- Isumaqarpugut qinersisarneq qinersisinnaatitaanerlu eqqarsaatigalugit oqartussaaqataanermut malittarisassat aqqutigalugit kikkunnik illersuinissatsinnut kinaassuserput aalajangiisuusariaqartoq, Jens Napãtôk oqarpoq.

- Kikkuunerput piaarnerpaamik aalajangertariaqarparput. Taamaalilluta immitsinnut danskeeqqatut isigiunnaassaagut, ajornannginnerusumillu sinaakkusiorsinnaanngorluta, politikkeri oqarpoq.

Inuit Ataqatigiit oqaaseqartartut Harald Bianco ilasseraarpasinnginnerusumik oqaaseqarpoq. Taassuma innersuussutigaa, Tunngaviusumik Inatsisissaq pillugu Isumalioqatigiissitap kikkut qinersisinnaatitaassanersut aamma Kalaallit Nunaata naalagaaffiani innuttaasuusinnaassanersut pillugit apeqqutinik suliaqarnera:

- Inuit Ataqatigiinnit isumalioqatigiissitap sulinera ataqqivarput, nalunngilarpummi pisinnaatitaaffiit inuiaqatigiinnilu pisussaaffiit isumalioqatigiissitap suliassaasa ilagigaat, Harald Bianco oqarpoq.

Demokraatit: Qaamatit arfinillit naapertuupput

Demokraatit isumaqarput, qaammatinut arfinilinnut killiliisimaneq ajunngivissoq:

- Isumaqarpugut qaammatinut arfinilinnut killiliisimaneq naapertuuttoq, piffissamimi pineqartumi politikkikkut aaqqissuussaq partiillu assigiinngitsut qanoq isumaqarnersut paasisaqarfigineqarsinnaasut, Jens-Frederik Nielsen maanna piumasaqaataasumik sivitsuinerup ajornartorsiortitsilersinnaaneranik isumaqartoq oqarpoq:

- Inuk Nunatsinni inunngorsimasoq peroriartorsimasorlu ukiuni arlaqartuni nunami allami najugaqarnissamik aalajangersimasoq, nunatsinnut uteqqinnissaq aalajangerpagu, nuunnissamut piumasaqaammit aamma eqqorneqarsinnaasoq. Kalaallimmi nunani allani najugaqartut nunatsinnut uterlutik taperseeqataaniarnerannut tamanna annertuumik ajornartorsiutaareerpoq - nuunnissamut piumasaqaatip sivitsorneqarnissaa aalajangissagutsigu uteqqinnissaq pilerinarnerulernavianngilaq, taanna oqarpoq.

Naalakkersuisut mianersoqqusisut

Atassummeersoq Aqqalu Jerimiassen naatsuaqqamik oqaaseqarpoq, tassani pingaartillugu oqaatigaa, Atassummit oqartussaaqataaneq nukittorsarneqarusuttoq, aamma inuit amerlanerit qanoq qinersitinneqartalersinnaanerat misissorneqartariaqartoq.

Naalakkersuisut akissuteqaatitut allakkiaminni mianersoqqutigaat, malittarisassanik allannguinermi innuttaasut politikkikkut pisinnaatitaaffii pillugit FN-ip isumaqatigiissutaanut akerlusumik Nunatsinnit iliuuseqarniarneq.

Oqallittoqarnerani partiit oqaaseqaataat naapertorlugit, Doris J. Jensenip Siumullu siunnersuutaattut nuunnermi piumasaqaammik sivitsuiniarluni malittarisassat allanngortinneqarniarnerat maannakkorpiaq amerlanerussuteqartunit isumaqatigineqarpasinngilaq.