Partiit Inatsisartut ataatsimiittarfiannit kamallutik aniasut
Siumut Demokraatillu Inatsisartuni ataatsimiinnerup aallartinnerani minutsialuit ingerlariiginnartut aniasimapput. Tamanna pivoq, qinikkap ataatsip peqqarniitsumik pissusilersornera inuit attaveqaqatigiittarfiisigut saqqummiunneqartoq pillugu partiit Naalakkersuisut isummertinniaraluarlugit iluatsitsinngimmata.
Inatsisartuni inissititerluni ataatsimiinnerup ulluata aappaa sakkortuumik aallartissimavoq. tassa partiit inatsiseqarnerut ataatsimiititaliami ilaasortassanik toqqaaniarneranni. Ilaasortassatut innersuussutigineqartut akuerineqanngitsiarneranni Siumumi ilaasortat arlallit oqaaseqarsimapput.
Vivian Motzfeldtip oqaatigaa, naalakkersuisooqatigiit erseqqissaatigisimagaat, nunami maani meeqqat atugaat pillugit sulissuteqarniarlutik. Ilaatigut Meeqqanut Ilaqutariinnullu Naalakkersuisoqarfimmik pilersitsinikkut.
Siumut isumaqarpoq, pisimasoq peqqarniitsoq inuit attaveqaqatigiittarfiisigut sukkasoorujussuarmik ingerlaartinneqartoq naalakkersuisooqatigiit partiianneersumik qinikkamut attuumassuteqartoq oqaluuserineqartariaqavissoq.
Politikkerip aappaata kinnaa aagasaartoq pillugu asseq Facebookikkut takuteqattaarneqarsimavoq. Soorlu aamma arfininngornerup sapaatillu akornanni unnuakkut aappariit illuanni pisimasoq aappariit ernerata filmiliarisimasaa facebookikkut saqqummiunneqarsimasoq.
Qinikkat maligassiuisussaasut
Taamatut qinikkat akornanni pisoqartussaanngilaq, Vivian Motzfeldt Sermitsiaq.AG-mut erseqqissaavoq, nangillunilu oqaatigalugu:
- Uagut qinikkat Inatsisartuni issiatitaasinnaalertinnata sutigut tamatigut nalilersorneqartarpugut. Politikkerip angerlarsimaffiani taamatut pisoqartarnera akuersaarsinnaanngilarput. Maligassiuisussaavugut, aamma meeqqat paarineqarnissaat pineqartillugu. Taamatut ittut akuersaarsinnaanngilagut, taanna oqarpoq.
Inatsisartut Siulittaasuata Hans Enoksenip, Vivian Motzfeldt Kim Kielsenilu oqallinnermut akulerukkusuttut ullormut oqaluuserisassanik samminneqqullugit piumaffigisimavai.
Erik Jensen tamatuma kingorna unikkallartoqarnissaanik piumasaqarpoq.
Naalakkersuisut nalilertariaqarpaat, pissutsinut taamatut ittunut akuersaarniarnerlutik. Unikkallartoqarnissaanilli piumasaqarnera Hans Enoksenimit itigartinneqarpoq, Erik Jensen Sermitsiaq.AG-mut oqaluttuarpoq.
Vivian Motzfeldtip nassuiaatigaa, pisumut taamak ilungersunartigisumut partii oqaaseqaqqusaatinnagu Siumut gruppia inersuarmiissinnaanngitsoq.
Tusaaneqanngitsut
Tamanna akuersaarsinnaanngilarput. Pisimasoq inuit attaveqaqatigiittarfiisigut oqaluuserineqaqaaq. Politikkeritut tamanna isiginngitsuusaarsinnaanngilarput, Vivian Motzfeldt Demokraatineersumit Anna Wangenheimimit taperserneqartoq oqarpoq.
- Qinikkatta taamatut pissusilersornera nipangiutiinnarsinnaanngilarput. Meeqaat illersorneqartussaapput. Soorlu naalakkersuisooqatigiilersut qineqqusaarnermi taamatut oqaluttut.
Taassuma erseqqissaatigaa, pisimasumi qanorluunniit pisoqarsimagaluarpat, meeqqap peqqarniitsumik pisumi angajoqqaami aappaa natermi nalasoq aappaata oqaatsitigut sioorasaaraa filmiliarisimagaa.
Demokraatit Siumukkormiusulli oqaaseqarusussimagaluarput, Hans Enoksenilli oqaaseqarusuttut tusaaniarsimanngilai.