Partiit sukkanerulinngippata ima ingerlatsoqarsinnaavoq: »Namminiilivinnissamut ukiut 200-t«
- Namminiilivinnissaq tapersersorneqarsinnaavoq Kalaallit Nunaannilu innuttaassuseqalernissaq qinnutigalugu. Taava nunamut oqaatigineqartutut ilumoortumik asanninneq pigineqarsimassaaq, Pele Broberg, Naleqqamit siunnersuut nutaaq, oqallinnermik qularnanngitsumik pilersitsisussaq, pillugu oqarpoq.
Pele Brobergip tamakkiisumik namminiilivinnissap ungasissorujussuusinnaanera ernummatigaa. Immaqa ukiunik 200-nik.
Aviisi AG taama allappoq.
Naleqqammi siulittaasua naapertorlugu partiini allani sukkanerusumik suleriaaseqarnissamik kissaateqarneq killeqartorujussoorpasippoq. Naalagaaffimmut namminerisamut alloriarnissaq siulliinnarluunniit – »inuiannik kalaallinik« nassuiaanissaq isumaqatigiissutinissaa – aporfissaavoq.
Maannali misileeqqilerpoq.
- Aap, partiit saqqummertinniarsaraakka, nammineq kajumissutsimik inuit nalunaarsorsimaffianni qinersisartullu nalunaarsorfimaffiannik atuutilersitsinissamik siunnersuutini nutaaq pillugu oqarpoq.
- Qaqugukkut inuit ilaattut inissisimasoqartassava taamalu nalunaarsuiffimmut ilanngunneqarnissamut pisinnaatitaaffeqarluni – tamanna misigisimaneqartussaava?
– Naagga, paatsuuineruvoq. Misigissutsinut IA-mit aamma saqqummiunneqarsimasutut tunngassuteqanngilaq. Kisianni ilaqutariinnermut tunngassuteqarpoq.
- Taavami Inuit qanoq annertutigisumik ilaqutarineqassappat?
- 0,1 procentiussanersoq 100 procentiussanersorluunniit pingaartinngilara, Pele Broberg akivoq itisiliillunilu:
- Kalaaliuneq pillugu oqaaseqatigiiliornitsinni Naleqqami eqqoqqissaarsimavugut, siusinnerusukkut siunnersuutaasimasumi oqaaseqatigiit uku innersuussutigalugit oqarpoq: »Angajoqqaavit arlaat Kalaallit Nunaanni inunngorsimappat, taakkualu angajoqqaavisa arlaat aamma Kalaallit Nunaaanni inunngorsimappat, taava tamanna ILLIT aamma kalaaliunissannut tapertaassaaq«.
Aviisimi AG-mi atuarnerusinnaavutit. Aviisi uani pissarsiariuk: