Partimi siunnersortip Atassut qimappaa
– Uanga partiimi imminnut avissaartuutsitsisut piffissaajaatiginianngilakka, Jensine Berthelsen, mannakkut Atassummik qimatsisoq oqarpoq.
Juunip aappaanili qinersisartut tunutsinerisa kingorna, Atassutip ilaasortaatitai arfinilinniit pingasuinnarnut affaannanngormata, taamanili Jensine Berthelsenip partiip siunissaa assut nalornissutigilersimavaa.
– Partiip iluani annertuumik avissaartuuttoqarpoq piviusorlu eqqortoq takuneqarusunngilaq, taamak ajorsarujussuarnerup kingorna partii qanoq ingerlariaqqinnissaanut tunngatillugu.
– Tamatuma akerlianik piffissaq asuli makkuloruusaarnermut aamma imminut ajortisaariniarnernut atorneqarpoq, Jensine Berthelsen sermitsiaq.gl-imut oqarpoq.
– Imminut ajortisaariniarnerit suut eqqarsaatigaagit?
– Soorlu assersuutigalugu Finn Karlsenip tunuarnera. Siulersuisuni ilaasortat ataasiakkaat pissusipalaat atorlugit siulittaasuuneranit tunuartippaat. Siulersuisut paatsiveqanngilluinnarput, Jensine Berthelsen, Atassummi 2002-miili politikikkut suliaqarsimasoq oqarpoq.
Partiimi siunnersorti aamma aaqqissuussaanermi siulittaasutut tulliusoq oqarpoq 2008-mi ataatsimeersuareernerup kingorna partiip iluani annertuumik aporaattoqartarsimasoq, namminerlu upperiunnaakkaminut nukissani atorusukkunnaarlugit.
Aggustip naanissaata tungaanut inatsisartuni ilaasortanut, tassaasunut Finn Karlsen, Siverth K. Heilmann aamma Knud Kristiansen partiimi siunnersortitut suligallarniarpoq.
Tamatuma kingorna Jensine Berthelsen suliffissarsiorpoq, taannalu inuttut inuunermut akornusersuivallaassanngilaq kiisalu tusagassiortutut sulinermut uteqqinnissani itigartivinngilaa. Siusinnerusukkut KNR-imi aamma Nuuk TV-mi sulereersimavoq.
Atassut nuna tamakkerlugu immikkut ataatsimeersuassaaq Sisimiuni 29. aamma 30. aggusti.