Pele Broberg (N) aaqqissuussaanermik apeqqusiivoq: Kikkut Kalaallit Nunaat sinniisuuffigivaat?
Naalakkersuisut Inatsisartullu Kalaallit Nunaat sinniisuuffigivaat imaluunniit folketingimut ilaasortat? Taamak aperivoq Naleqqap siulittaasusa Pele Broberg § 37 aqqutigalugu apeqqummini, taassuma innersuussutigivaa aaqqissuussaaneq isummani naapertorlugu ersernerluttuusoq.
Politikerit ikigisassaanngitsut oqaluuseriuartarpaat - maannamulli arlaannaalluunniit tigussaasumik siunnefissamik saqqummiussinikuunngilaq, nunarput sinnerlugu folketingimi issiaviit marluusut qanoq atorneqassanersut Inatsisartut Naalakkersuisullu oqartussaassuseqarnerat annertusiartortillugu.
Maannakkut Folketingemi ilaasortaasoq, Aki Matilda Høegh Dam (S) partii Siumup ataatsimeersuarnerani siulittaasussarsiornermut atatillugu allannguisoqarnissaanik ujartuisuunikuuvoq. Taassuma ammasumik nassuerutiginikuuaa nunatsinni sulerusunnerungaarluni Danmarkimiit sulinissamut sanilliullugu, tassungalu atatillugu anguniagarinerarnikuuaa inuiaat kalaallit folketingimi ilaasortanik sinniisuutitaarutissasut.
Folketingimut qinersisarneq atorunnaarsinneqarli
Maanna tigussaasumik ujartuilluni Pele Broberg misiliivoq apeqqut akissutissarsiniarsaralugu.
Taamaaliorpoq § 37 aqqutigalugu apeqquteqarnermigut (apeqq. 183/2023). Taanna innersuussivoq Namminersorluni Oqartussaanerup inatsisaa aammalu Tunngaviusumik Inatsit folketingimi kalaallit sinniisuutitaarunnissaanik periarfissiisut.
Broberg piumasaqarpoq akineqassalluni suli qanoq sivisutigisumik ersarluttuussanersoq Kalaallit Nunaat Naalakkersuisut Inatsisartullu imaluunniit folketingimut ilaasortat sorliit sinniisuuffigineraat.
Aappaattut taanna akissutiserusuppoq Naalakkersuisut piareersimaffigineraat Danskit Naalakkersuisui attaviginissaat nunatsinniit folketingimut qinersisartarunnaarnissaq nalunaarutigeqqullugu, Danskit tunngaviusumik Inatsimmi §32, imm. 5 malillugu inatsisiliorsinnaaniassammata.
Pingajuattut Broberg akissutiserusuppoq Naalakkersuisut apeqqut 2 malillugu nammineerisaminnik iliuuseqarusunnersut imaluunnit aatsaat inatsisartut isummerteqqaarlugit iliuuseqassamaarnersut.
- Namminiilivinnissaq oqarluartaarutaajuartoq, allaat suli danskit “naalangaaffeqatigiiffianiit” aninataluunniit folketingimut qinersisarunnaarnissaq tikinneqarsinnaanngippat qanoq pimoorussitiginersugut uppernassuseqarnavianngimmat, Broberg apeqquteqarnermini tunngavilersuivoq.