Pele Brobergimut: Kalaallit Nunaat Folketingimut qinersisarunnaassanngilaq
Folketingimut nunatsinni qinersisarneq Naleqqami siulittaasup taamaatikkusuppaa, isumaqarami nunatsinniit folketingimiititsisarneq Danmarkip pisortatigoortumik nunasiaateqanngitsuusaarneranut kusassaataannaasoq. Folketingimulli qinersinnginnissamut inatsisitigut tunngavissaqanngitsoq, Naalakkersuisoq akissuteqarluni allappoq.
Inatsisartuni ilaasortaq Naleqqallu siulittaasua Pele Broberg paragraf 37 naapertorlugu Naalakkersuisunut decembarip 15-ani 2023-mi apeqquteqarpoq Naalakkersuisut piareersimaffigineraat Danskit Naalakkersuisui attaviginissaat nunatsinniit folketingimut qinersisartarunnaarnissaq nalunaarutigeqqullugu, Danskit tunngaviusumik inatsimmi §32, imm 5 malillugu inatsisiliorsinnaaniassammata.
Vivian Motzfeldt akissuteqaatimini allappoq Inatsit Tunngaviusumi §32 immikkoortoq 5-ip oqaasertaata qanoq paasineqamissaa pillugu Naalakkersuisut danskit oqartussaasuinut akisussaaffimmik tigummiaqartuusunut saaffiginnissimalluni:
- Inatsiseqamermut Ministeria tassani naatsumik ilisimatitsilluni oqaatigaa Kalaallit Nunaat Folketingimut qinersinnginnissamut inatsisitigut tunngavissaqanngitsoq.
- Taamaattumik tamanna tunngavigalugu Kalaallit Nunaanni Folketingimut qinersisarunnaarnissaq siunertaralugu Naalakkersuisut danskit naalakkersuisuinut saaffiginnissuteqarnianngillat.
Kikkut Kalaallit Nunaat sinniisuuffigivaat?
Pele Broberg ilanngullugu apeqqutigaa Naalakkersuisut Inatsisartullu Kalaallit Nunaat sinniisuuffigineraat imaluunniit folketingimut ilaasortat.
Naalagaaffinngornissamut Nunanullu allanut Naalakkersuisoq, Vivian Motzfeldt akissummini allappoq inuk kinaluunnit partii Inatsisartuni sinniisuutitaqartoq imaluunnit partiit avataatigut qinigassanngortinnissaminut nalunaaruteqarsinnaasoq. Qineqqusaartunilu qinerneqarnerpaaq qinerneqarnerpaallu tullia Folketingimi ukiuni sisamani qinikkatut sinniisunngussasut.
- Inatsisartuni ilaasortat Folketingimilu ilaasortat parteertik sinniisuuffigaat. Naalakkersuisut Siulittaasuat Naalakkersuisullu Inatsisartunit qinerneqartarput. Qinersineq tamanna tunngavigalugu Naalakkersuisut tamarmiusut tamat oqartussaaqataaneranit qinerneqartut pisortatigoortumik Kalaallit Nunaata iluani avataanilu sinniisuupput.
Peqqissaartumik oqallisigineqaqqaassaaq
Pele Brobergip ilanngullugu apeqqutigaa Folketingimut qinersisarunnaarnissaq eqqarsaatigalugu Naalakkersuisut nammineerisaminnik iliuuseqarusunnersut imaluunnit aatsaat inatsisartut isummerteqqaarniarneraat.
Vivian Motzfeldt akissummini allappoq Kalaallit Nunaanni Folketingimut qinersisarunnaarnissaq pillugu danskit oqartussaasuinut saaffiginninnissaq pitinnagu inuiaqatigiinni Inatsisartuniluunnit peqqissaartumik oqallisigineqaqqaassasoq:
- Maanna Kunngeqarfiup aaqqissuussaanera taamatut isikkoqartillugu Kalaallit Nunaata naalagaaffimmit oqartussaaffiit suliassaqarfiusut tigusinnaanngisai 30-it missaanni amerlassuseqarput.
Oqallisigineqarsinnaalluartoq
Naalagaaffinngornissamut Nunanullu allanut Naalakkersuisoq, Vivian Motzfeldt aamma akissummini allappoq Kalaallit Nunaanni Namminersornerullutik Oqartussat, kingusinnerusukkullu Namminersorlutik Oqartussat pilersinneqannginneranili Inatsit Tunngaviusoq atuutsilersinneqarnikuusoq.
Kalaallit Nunaannut tunngatillugu Kalaallit Nunaanni Namminersornerullutik Oqartussat, kingusinnerusukkullu Namminersorlutik Oqartussat eqqunneqareernerata kingorna Kalaallit Nunaat sinnerlugu Naalakkersuisut isumaqatigiinniarsinnaallutillu sinniisuusut, inatsisiliornerullu tungaatigut Inatsisartut Folketingilu immikkut imminnut atassuteqaqatigiittut.
- Taamaattumik kalaallit folketingimi ilaasortaatitaqartarnerannut aaqqissuussinerup oqallisigineqarnissaannut tunngavilersuut Naalakkersuisunit takulluarsinnaavarput. Oqallisigineqarnissaalu Naalakkersuisunit ilassilluarparput.