Peqatigiiffik Kalaallit Meerartaat: Peqatigiiffik Sort Sne itigartissiuk
Sort Sne maanna ilaasortassarsiorniarsarisoq taperserneqartariaqanngilaq, Peqatigiiffik Kalaallit Meerartaat taama mianersoqqussuteqarpoq.
Peqatigiiffik Kalaallit Meerartaasa peqatigiiffik Sort Sne maanna ilaasortassarsiorniarsarisoq toqqaannartumik mianersoqqussutigaa. Taarsiullugu peqatigiiffiit ilisimaneqartut toqqaannartumik taperserneqartariaqarput, taama kajumissaarisoqarpoq.
Sermitsiaq.AG-p allaaserisaatut, Sort Sne aningaasanik Kalaallit Nunaanni meeqqanut mianerna katersuiniarneqarnerarpoq, suliffeqarfinnik inunnullu ataasiakkaanut ilaasortanngortitsinermikkut.
Nittartakkamilu Peqatigiiffik Kalaallit Meerartaat suleqatiginerarneqarput.
- Peqatigiiffik Sort Snemik taagortoq uagut susassaqarfiginngilarput. Pissutsit suliallu ernumanartut peqatigiiffimmut attuumassuteqartut paasisinnaavara, ilaatigut Katersuiniarnermut aalajangiisartunit akuersiissuteqanngillat, Puk Draiby, Peqatigiiffik Kalaallit Meerartaanni pisortaq taama oqarpoq.
Attaveqarfigineqarnermi peqatigiiffik Sort Sne itigartinneqassasoq, taassuma inassuteqaatigaa.
Taarsiullugu Peqatigiiffik Kalaallit Meerartaat imaluunniit peqatigiiffik alla ataqqineqartoq taperserneqarttariaqarpoq, taanna taama kajumissaaruteqarpoq.
Sermitsiaq.AG-p ippassaq saqqummiussinerata kingorna, Peqatigiiffik Kalaallit Meerartaannut innersuussineq Sort Snep nittartagaanit peerneqarpoq.
Inatsisit avataanniittoq
Aningaasanik katersuiniarniaraanni, nalinginnaasumik Katersuiniarnermut aalajangiisartunit akuersissut piuumasaqaataavoq.
Kisianni angut Sort Snemik aallarniisoq, Anders Hjort Busk Sermitsiaq.AG-mut nassuiaavoq, ilaasortassarsiorami aamma toqqaannartumik aningaasanik katersuiniannginnami periusoq unioqqutitsinerunngitsoq.
Tunngaviusumik ikiuniaqatigiiffimmut ilaasortanngortitsineq inatsisinik unioqqutitsinerunngilaq, kisianni tamatumunnga arlalinnik piumasaqaateqartoqarpoq. Katersuiniarnermut aalajangiisartut nittartagaanni tamanna atuarneqarsinnaavoq.
- Inuttut imaluunniit oqarasuaatikkut saaffiginnilluni ikiuniaqatigiiffimmut ilaasortanngortitsiniarneq, piviusumik ilaasortaaneq pineqartillugu, ilaasortaasut peqatigiiffimmik pissarsiaqartillugit katersuiniarnermut inatsit akornutaanngilaq, assersuutigalugu peqatigiiffiup ataatsimeersuarneranut peqataasoqarsinnaaneratigut imaluunniit allatut ilaasortaanermut pissarsiaqarnerisigut. Aammattaaq ilaasortaanermut akiliut aalajangersimasuussaaq, kisianni inunnut eqimattanut aalajangersimasunut, soorlu ilinniartunut aamma soraarnerussutisialinnut appasinnerusinnaalluni, tamanna allaqqavoq.
Katersuiniarnermut aalajangiisartut suliat aalajangersimasut oqaaseqarfigisinnaanngilaat, aamma Sort Sneå suliai inatsiseqarnerup iluani imaluunniit avataani inissisimanersut maanna oqaaseqarsinnaanani.
Taamaattorli allattoqarfimmi pisortaq Eva Aaen Sermitsiaq.AG-mut ilisimatitsivoq, aalajangiisartut Sort Snemit nalunaaruteqarfigineqarpata suliaq misissorneqarumaartoq.
Peqatigiiffik Kalaallit Meerartaat suliami iliuuseqaqqissanerluni misissuivoq.