Peqatigiiffik qatserisartut akiuussutissalerneqarnissamut piumasaqaateqarfigineqarnerannut akuliuttoq
Suliami ataasiinnaanngitsumi, marlunnili upalungaarsimasutut sulisut akiuussutissalerneqarsimannginnerat pissutigalugu sulinngiffeqartinneqarput. Tamanna Kalaallit Nunaanni Qatserisartut Peqatigiiffiata Kommuneqarfik Sermersuumi borgmesterimut allagaani ammasumi atuarneqarsinnaavoq.
Kommuneqarfik Sermersuumi upalungaarsimasut pisortaata tulliata Jens Mikkelsenip ukioq manna januaarip 24-ani qatserisartunut allagaani atuarneqarsinnaavoq, kommuni aalajangersimasoq atorfinni aalajangersimasuni sulisut akiuussutissalerneqarnissamut piumasaqarfigineqarsimasut.
- Atorfinnut pineqartunut ilaapput qatserisartuni sulisut. Allakkat malillugit piumaqaatigineqarpoq, qatserisartunit sulisut tamarmik februaarip sisamaat aallarnerfigalugu akiuussutissalersorneqarsimassasut.
Inatsimmik unioqqutitsinerusoq isumaqartoq
Siulittaasup oqaatigaa, allakkat malillugit sulisut marluk piumassuserinngisaannik sulinngiffeqartinneqalersimapput. Aappaa januaarimi Covid-19-imik tunillatsissimavoq, taamaammallu sapaatip-akunnerini tulliuttuni aqqaneq-marlunni tunillatsissinnaanani, tamatumali angerlartitsineq allanngortissimanngilaa.
Formanden for Kalaallit Nunaanni Qatserisartut Peqatigiiffiani siulittaasup Poul Olsenip taamatut nalunaaruteqartoqarsimanera naammaginngilluinnarpaa.
- KaNuQaPe-miit sakkortunerpaamik piumasaraarput, aalajangiisimanerup tamatuma tunuartinneqarnissaa. Taamatummi aalajangersimaneq inatsimmik unioqqutitsineruvoq. Kalaallit Nunaanni Danmarkimiluunniit akiuussutissalerneqarnissaq piumasaqaataanngilaq, inassuteqaataannaavoq. Taamaammat sulisut akiuussutissalerneqarsimannginnerat tunngavilersuutigalugu soraarsinneqarsinnaanngillat, siulittaasoq oqarpoq.
Taassuma paaserusunnerarpaa, kommuni akiuussutissalerneqarsimanissamut piumasaqaateqarnermut inatsisitigut tunngavissamik suminngaanniit pissarsisimanersoq.
Kommuneqarfik Sermersuumi Sanarfinermut Avatangiisinullu Ingerlatsivimmi pisortap Hans Ulrik Skiftep Sermitsiaq.AG-mut ilisimatitsissutigisimavaa, qatserisartup sulinngiffeqartinneqalersimanera kukkunerusoq, erseqqissaassutigalugulu sulisut akiuussutissalerneqarsimanngitsut soraarsinneqarnissaat kommunimit politikkerineqanngisaannarsimasoq. Pisortap qatserisartoq pineqartoq nammineerluni saaffigalugu utoqqatserfiginiarpaa.
Aqutsisunut kinguneqartinneqartariaqartoq
Qatserisartut siulittaasuata ilanngullugu allappaa, qatserisartut marluk akiuussutissalerneqarsimanngitsut pinngitsaaliissummik upalungaarsimasunit sulinerminnit angerlartinneqarsimasut peqatigiiffimmit ilisimaneqartoq.
-Inunnik malersuinertut, akiuussutissalerneqarsimanngitsunik immikkoorittsinerut oqaatigerusupparput, tamannalu akuersaarneqarsinnaanngilluinnarlunilu pissusissamisuunngilluinnarpoq, isumaqarpugullu aqutsinerluttoqarsimasoq.
Kommunip suliami kukkusoqarsimaneranut tunngavilersuutigisimavaa, kommunip upalungaarsimasullu akunnerminni kukkussuteqarsimanerat.
Peqatigiiffimmit isumaqartoqarpoq, pisimasoq upalungaarsimasut aqutsisuinut kinguneqartinneqartariaqartoq:
- SAqutsisut taamatut annertutigisumik kukkussuteqarsinnaanerat kinguneqartinneqartariaqarpoq. Suliamut atatillugu takusinnaavarput, Kommuneqarfik Sermersuumi Qatsersiartut tusaamaneqarnerat ajoquserneqarsimasoq, tamannalu ingerlaannartumik aaqqiiffigineqartariaqarpoq.