Peqqarniisaartarnermik ilisimasalik: Pissanganartumut killeqqippugut
Akiniaaniarnerusimasinnaavoq, qaartartumik qaartitsinermi tunulequtaasut pillugit Han Jørgen Bonnichsen oqarpoq. Isumaqarlunilu qaartartulerisimasoq qaartartumik allakkatigut nassiussassamik sananiarsimagaluartoq.
Arlaannik siunertaqarsimassagaluarpoq.
Politiit Jyllands-Postenip Århusimi qullersaqarfiata assinganik nassaarsimannginnerarmata PET-imi qullersaasimasoq Hans Jørgen Bonnichsen taamatut naliliivoq.
– Taama erseqqitsigisumik taamaattoqannginneraammata isumaqarpunga qanorluunniit eqqoriaasoqarsinnaanngortoq. Politiit qaartartumut atortussat tamaasa nassaarisimanerarmatigit peeqarniisaarujussuassamaarsimanermik ilimanartoqarsimassanngilaq, oqarpoq.
Angutip kinaanera ilisimaneqanngitsup tallimanngormat Belgiamiit bussimut ilaalluni tikissimanera Hans Jørgen Bonnichsenip maluginiarpaa.
– Kisimiillu pilersaaruteqarsimaguni imminuujutigaluni qaartartumeeriniarsimassanngilaq, oqarpoq.
– Qaartuutaa annikissimagami qaartartumik allakkatigut arlaannut nassiussassaminik sananiarsimassaaq, Hans Jørgen Bonnichsen oqarpoq.
Politiit tusagassiortunik sapaatiummat katersortitsineranni erserpoq, angut qaartartuutilik tigusarineqannginnermini allakkerisarsimmi papkasseeqqamik tapemillu pisisimasoq.
PET 1996-imi suliassamik tassunga assingusumik suliaqarsimanerarpaa, ingasattajarlutik talerpilliuniat qaartartumik 90 gramminik oqimaassusilimmik videokassettemut ikisillutik Londonimut nassiusseriaraluarsimammata.
Inuit tassani pineqartut nakkutigineqarnerat pissutaalluni tamanna iluatsissimanngilaq, massakkulli qaartartuutilik nakkutiginqarsimanani.
– Peqqarniisaarniartuusimaguni, kisimiilluni namminerlu akisussaaffigalugu iliuuseqartuusimassaaq. Tamakku pikkorluttuugajuttarput, taamaattorli kinaassutsiminnik isertuussinermikkut anningaalanermik pilersitsisinnaasarlutik, Hans Jørgen Bonnichsen oqarpoq.