Peqqinnissaqarfik pingajussaanik kapuuiniartoq
Utoqqaat illuini najugaqartut inuillu navianartorsiortut allat oqartussat pilersaarutaat malillugu oktobarip ingerlanerani pingajussaanik akiuussutissalerneqassapput.
Nunatsinni nakorsaanerup Henrik L. Hansenip siusinnerusukkut oqaatiginikuuaa, inuit coronavirusimik tunillatsissagaluarunik immikkut navianartorsiortutut nalilerneqartut pingajussaanik akiuussutissalerneqarnissaat oqartussanit eqqarsaatigineqartoq.
Pingajussaanik akiuussutissalerneqarneq Covid-19-imik napparsimalersinnaanermik pinngitsoortitsinerusinnaavoq.
Pingajussaanik kapoorinissaq qanoq aallartinneqassanersoq pilersaarusiorneqarsimasoq, Coronamut atatillugu sulisut ilisimatitsipput.
Sulisunit oqaatigineqarpoq, pingajussaanik kapitittussat tamarmik peqqinnissaqarfimmit attavigineqassasut.
Nualluummut akiuussusertinnissamik neqerooruteqarnermut ilanngunneqassasoq
Pilersaarutaavoq utoqqaat illuini najugaqartut inuillu navianartorsiortut oktobarip qaammataata ingerlanerani pingajussaanik akiuussutissalerneqassasut.
Coronamut atatillugu sulisut ilisimatitsissutigaat, inuit nappaatillit Covid-19-imik tunillatsissagunik napparsimalernissamut immikkut ulorianartorsiortut pineqartut.
- Inuit pineqartut tassaapput akiuussutissalersuineq aallartinneqarmat siulliullutik kapitinnissamut neqeroorfigineqarsimasut, Coronamut atatillugu sulisut Sermitsiaq.AG-mut allakkatigut akissuteqarlutik ilisimatitsippput.
Danmarkimi 65-ileereersimasut tamarmik pingajussaanik akiuussutissalerneqassanersut oqallisaasimavoq, tamannali pisariaqarnersoq pillugu suli inaarutaasumik isummertoqarsimanngilaq.
Nunatsinni aamma tamanna atuuppoq, Coronamut atatillugu sulisut ilisimatitsipput.