Peqqinnissaqarfimmi sulisut naammagittaalliuutigineqartarnertik qatsutileraat
Nakorsat peqqinnissaqarfimmilu sulisut allt innuttaasut tamat takusinnaasaannik naammagittaalliuuteqarlutik nittarsaassisarnerat qatsulluinnarpaat erloqinartutullu misigalugu. Sulerusussuseq annikillisuulertarpoq, Sermersuumi peqqissaavimmi nakorsat aqutsisuat oqarpoq.
Peqqinnissaqarfimmi sulisut naliliisarnerat nakorsaasiisarnerallu pillugit nittartakkani attaveqatigiiffiusuni saqqummikulaarput. Peqqinnissaqarfimmi sulisut isornartorsiorneqarnerminni akissuteqarsinnaasanngillat inuit ataasiakkaat sullinneqarnerat pillugu nipangiussimasussaatitaangamik.
Nakorsalli marluk nittartakkani attaveqatigiiffiusuni ammasumik piffissami kingullermi allagaqarput, peqqinnissaqarfimmut tunngatillugu innuttaasut naammagittaalliornerat qatsutilerlugu. Nakorsap aappaata nunatsinni suliunnaarnissani eqqarsaatigaa, innuttaasullu aaqqiissuteqarnissamik ujartuinerunissaat akerartuiunnaarnissaallu kissaatigigaluarlugu.
Pissutsit nukillaarnartut
Nakorsat oqariartuuteqarsimasut Sermersuumi qitiusumik peqqinnissaqarfimmi nakorsaanermit, Jesper Olesenimit ilalerneqarput. Taanna isumaqarpoq isornartorsiuingaatsiarneq peqqinnissaqarfimmi sulisut sulerusussusaannut annikillisitsisartoq.
- Soorunami aliatsassinnaasarpugut peqqinnissaqarfiup aaqqissugaanera taama isornartorsiorneqartigisarmat. Inuiaqatigiinni taama ikitsigisuni najugaqaraanni, ilisimaneqartarpoq kikkut nakorsaanersut, kikkullu peqqinnissaqarfimmi sulisuunersut. Taamaammat isornartorsiutit inunnut ataasiakkaanut toqqaannartumik tunngasorujussuanngortarput, Jesper Olesen oqaluttuarpoq nangillunilu:
- Taama isornartorsiorneqartigitilluni sulerusussuseq apparsinnaasarpoq. Isornartorsiutimmi suliatta qaavatigut aamma isumaginiartussaavagut. Sulivugummi innuttaasut ikiorusukkatsigit, oqarpoq.
Tapersersoqatigiinneq pingaaruteqarpoq
Nakorsat aqutsisuata peqqinnissaqarfimmi sulisut tapersersoqatigiittarnerat eqqaavaa.
Erseqqissarpaali nakorsiartut peqqinnissaqarfimmilu sulisut suleqatigiilluarnissaat pingaaruteqartoq, nakorsaatit eqqortut atulernissaat anguneqarsinnaassappat.
- Erseqqissarusuppara amerlanertigut nakorsiat peqqinnissaqarfimmilu sulisut suleqatigiilluartarmata. Paatsooqatigiinnerit misissuinermilu naliliinerit kukkusut pisinnaapput. Taamaammat pingaaruteqarpoq eqqaasitsissutigissallugu nakorsiarnermi inersimasumik allamik ilagisaqarsinnaaneq inissaqartittaratsigu, nakorsiarnermilu allattorneqarsimasut aamma piumaneqarsinnaajuaannarmata, oqarpoq.
- Ernumagilluinnarparput innuttaasut peqqinnissaqarfiup ajorneranik naliliillutik nakorsiarumajunnaartalissappata. Tamanna ulorianarluinnarsinnaavoq. Taamaammat nakorsiartunik misissueqqinnissatsinnut periarfissinneqaqqittuarnissarput pisariaqarpoq. Nakorsiaq amerlasooriarluni aggertarsinnaavoq, takkutinngitsuuinnermiit ajunnginneruvoq, Jesper Olesen oqarpoq.
Suleqatigiilluarnissaq pisariaqarpoq
Qaammatini arlalinni kingullerni nakorsiat, assersuutigalugu meeqqat amerluuteqartut, pillugit naammaginnikkunnaartut arlallit saqqummerarput. Meeqqat angajoqqaatik ilagalugit Danmarkimut misissortikkiartortarsimasut nittartakkami oqaluttuarineqareerput.
Jesper Olesenip qularinngilaa peqqinnissaqarfimmi sulisut ilaatigut kukkusumik naliliisinnaasarnerat. Nakorsaatillu iluaqutaanngippata nakorsiap uteqqinnissaa pingaaruteqarluinnartoq eqqaasitsissutigaa.
- Soorunami naliliinerit kukkusuusimasinnaapput. Tamanna tamani takussaavoq. Taamaammat pingaaruteqarluinnarpoq nakorsiap uteqqittarnissaa, nakorsaatit taarserneqarnissaat anguneqassappat. Uteqqippammi nakorsaasersuineq pitsaanermut aallartissinnaavarput, periarfissarititagut atorlugit, Jesper Olesen oqarpoq.