Peqqinnissaqarfimmi taarsiissuteqariaaseq nutaaq: Aningaasat ikippallaarujussuaqaat
Peqqinnissaqarfimmi sulisut periuseq artukkerneqarsimalluni uippakajaarfiullunilu qaffasippallaanillu isumalluuteqarfiusoq suliffigaat. Kukkusoqarsinnaavoq. – Napparsimasut sulisullu pitsaanerusumik illersorneqartariaqarput, suliassaqarfimmi Naalakkersuisuusimasoq isumaqarpoq.
Ungasinngitsukkut Demokraatiniit Anna Wangenheim sulinngiffeqarnermi kingornagut Inatsisartuni mailiminut iserami mailit 3.000-it takkussimapput. 2024 Wangenheimimut ukiuussagunarpoq naalakkersuinikkut ulapinnartoq, ilisimaneqarpormi nunatsinni suliassaqarfiit tatineqarnersaat peqqinnissaqarfik pillugu oqallinnermi ersarissumik oqaaseqartartutut.
Aviisi AG taama allappoq.
Mailit takkussimasut ilagaat inatsisissatut siunnersuut upernaakkut ataatsimiinnermi saqqummiunneqartoq pillugu apeqqutit, Wangenheimip oqaaseqartartuuffigisaannut tunngasut. Siunnersuummi ammaanniarneqarpoq angajoqqaat 184.500 koruuninik taarsiissuseqarfigineqarsinnaalernissaat peqqinnissaqarfimmi meerartik katsorsarneqartilluni annaaneqarpat. Wangenheimip aningaasat iluarsineqartariaqarsorai.
- Isumaqarpunga qaquguluunniit asasamik ilaqutariinnilu qanigisamik annaasaqarneq aningaasartalerneqarsinnaanngitsoq, ingammik meeraq annaagaanni, oqarpoq.
Nangillunilu oqaatigaa aningaasat amerlanerusariaqartut:
- Aningaasat ikippallaarujussuarsoraakka.
Aviisimi AG-mi atuarnerusinnaavutit. Aviisi uani pissarsiariuk:
