Peqqinnissaqarfiup aaqqissuuteqqinnissaanut isumaqatiginninniarnerit aallartipput
Peqqinnissaqarfiup aaqqissuuteqqinnissaanut isumaqatiginninniarnerit aallartinniarlugit Naalakkersuisut sisanngornermi partiit ataatsimeeqatigissavaat.
Ernisarfiit marlunnut killilerneqassappat? Peqqinnissaqarfimmi sulisut qanoq attanneqarsinnaappat aamma nunanit allanit sulisut pilerisaarneqarsinnaappat? Nuummi Peqqinnissaqarfiup attaveqarfigineqarsinnaanera qanoq pitsanngorsarneqarsinnaava?
Qulaani allassimasut tamarmik ajornartorsiutaapput, taakku Peqqinnissaq pillugu Ataatsimiititaliarsuup politikerinit iliuuseqarfigineqarnissaat innersuussutigaat, sisamanngorpallu periarfissaqassapput.
Tassami peqqinnissaqarfiup aaqqissuuteqqinneqarnissaanut oqallinnerit isumaqatiginninniarnerillu aallartinnissaannut Inatsisartuni partiit Naalakkersuisut qaaqqusimavaat. Naalakkersuisut tusagassiuutinut nalunaarummi taama ilisimatitsipput:
- Peqqinnissaq pillugu ataatsimiititaliarsuup isumaliutissiissutaata innersuussutaatalu atuarnissaannut tamatta periarfissaqarsimalerpugut, taamaalillutalu suliamut ilisimasanik tunngavissaqarluarluta peqqinnissaqarfiup siunissaa eqqartorsinnaanngorparput.
Partiit tamarmik peqataaffigisaannik isumaqatigiinnissaq neriuutigigaa
- Taamaattumik partiit peqqinnissaqarfiup aaqqissuuteqqinnissaanut naatsorsuutaat kissaataallu pillugit aallarniutaasumik oqallinnissamut qaaqqusimavakka. Peqqinnissaqarfik siunissami qaninnerusumi ungasinnerusumilu qanoq pitsanngorsarsinnaanerlugu isumaqatigiissaagut, peqqissutsimut naalakkersuisoq, Mimi Karlsen (IA) taama oqarpoq.
Peqqinnissaqarfiup aaqqissuuteqqinneranik partiit tamarmik peqataaffigisaannik isumaqatigiilluarnissarput iluatsikkumaartoq neriuutigaa.
Peqqinnissaqarfik suliassarpassuartigut tatineqarmat sulisussaaleqiffiummallu, politikerit suliassarujussuaq tigussavaat. Peqqinnissaq pillugu ataatsimiititaliarsuullu pitsanngorsaanissamut innersuussutai 100-nit amerlanerusut akeqartussaapput. Aningaasat politikerit suliassaqarfinnik allanik kingulliutitsillutik imaluunniit akileraarutit qaffanneqarnerisigut pissarsiarisariaqagaat.
Peqqissutsimut naalakkersuisup peqqinnissaqarfik pillugu Danmarkimit ikiorneqarnissamik qinnuiginnissimasoq, Sermitsiaq.AG-p ukioq manna siusinnerusukkut oqaluttuaraa. Nakorsiartut Danmarkimut aallartinneqartut Danmarkip akilertassagai, naalakkersuisup siunnersuutigaa – akiligassaq ukiumut 138 mio. kr.-nit missaanniittoq.