Peqqissutsimut ataatsimiititaliami siulittaasup tullia: Meeqqat kigutaasa peqqissusaannut tunngatillugu sipaarasi

Peqqinnissaqarfiup iluani allanngortitsineq sipaarniarnerluunniit meeqqat kigutaannut kingunerluuteqarsinnaanera ilumoorsinnaanngilaq. Inatsisartuni Peqqissutsimut ataatsimiititaliami siulittaasup tullia, Stine Egede taama isumaqarpoq.

- Inissaminiinngilaq sipaarniarnermi meeqqat eqqorneqarnissaat. Allannguinermi qanorsuaq taagoraluaraanni pinngitsoorani sipaaruteqarfiussaaq, oqarpoq.

Taassuma takorusunneruaa inersimasut kigutileritittarnerat tunulliunneqassasoq, meeqqat kigutaasa suliarineqarnissaat narlorsartarnissaallu akissaqarfigineqartuaannaqqullugit.

- Inersimasut kigutitik namminneq akisussaaffigivaat, taamaattumillu kiguserigunik aamma namminneq akisussaaffigisussaallugu. Inersimasut kigutileritittarnerisa tunulliunnissaat inissaminiinneruvoq, meeqqat akissaqarfigineqarniassammata, meeqqammi akisussaaffigisinnaanngilaa kigutini equngappata, nassuiaavoq, ilanngullugulu oqaatigalugu sammisap ataatsimiititaliami oqaluuserineqarnissaa piukkunnarsinnaasoq.

Aalajangerneq

Sermitsiaq.AG-p sisamanngormat allaaseraa Peqqinnissaqarfimmi qullersaqarfiup meeqqat kigutaasa narlorsarneqartarneranni bøjlelersuilluni suliaqarnerit unitsissallugit aalajangersimagaa. Taama aalajangernermut tunngavilersuutigineqarpoq nuna tamakkerlugu kommunit kiguleriffiini kigutilerisunik assingisaanillu sulisussaaleqisoqarnera.

Pisortat kigutileriffiini bøjlelersuiunnaarput

Taama aalajangerneq isumaqarpoq angajoqqaat meeqqatik bøjletaassappata kigutilerivinnut namminersortunut isumagitittariaqalissagaat. Taamaasiornermi angajoqqaat ikinnerpaamik 15.000 koruuninik akiliisassapput, akiligassarli 30.000 koruunit sinnersinnaavaa. Nuummi taamaallaat namminersortunik kigutilerisoqarpoq.

MIO: Isumaqatigiissut eqqaamallugu

Aalajangernerli kigutigissaaneq pillugu namminersornerullutik oqartussat nalunaarutaannik malinninngilaq, nalunaarummimi erseqqissarneqarsimavoq sulisussaaleqinermi aningaasaliissutissaaleqinermiluunniit meeqqat tamatigut salliunneqartassasut.

Kigutigissaanermi allannguisoqarnera nalunaarummik malinninngilaq

Meeqqat Illersuisuat Aviâja Egede Lynge ilisimatitsivoq aalajangerneq meeqqat pisinnaatitaaffii pillugit isumaqatigiissummut, Kalaallit Nunaata peqataaffigisaanut, aamma malinninngitsoq.

Kigutigissaanermi neqeroorutit ilaat akeqassappata, taava angajoqqaat ilai meeqqat kigutaasa suliarineqarnissaannut akissaqarsinnaassanngillat.

- Aalajangernerup meeqqat pisinnaatitaaffii pillugit isumaqatigiissummi naligiissitaaneq immikkoortinneqannginnissamullu illersorneqarnissaq pillugu immikkoortumik malinninngilaq. Meeqqat kigutaasa narlorsarneqarnissaannut bøjlelersuisarnerup akeqanngitsumik neqeroorutaajunnaarnera, meeqqat pissakinnerusunik angajoqqaallit immikkoortippai, oqarpoq.

Taassuma erseqqissaatigaa Kalaallit Nunaanni angajoqqaat arlaqartut pissakitsuusut.

- Meeqqat amerlasoorpassuit angajoqqaaminni kisimiittuni peroriartorput. Aalajangerneq taamaatsiinnarneqassappat, meeqqat amerlanerusut kigullulersinnaanerat aarlerinarpoq, aamma meeqqat ilinniarluarsimasunik angajoqqaallit eqqarsaatigalugit, Aviâja Egede Lynge oqarpoq.