Peqqissutsimut naalakkersuisut atsioqatigiittut
Issittumi peqqissutsimut naalakkersuisut peqqinnissaqarnermi issittumi peqqussutsimut naalakkersuisut ataatsimiinneranni siullermi suleqatigiinnerunisaq pingasunngornermi Nuummi qallattorpaat
Ataatsimiinnerup qulequtaraa »Shared Challenges - Different Solutions« (Misileeqatigiinneq - aaqqiissutit assigiinngitsut).
Issittumi nunat peqqinnissaqarnermi arlalinnik misileeqatigiiffissaqarput. Ilaatigut nappaatit inooriaatsimit aallaaveqartut amerliartuinnarneri aamma nappaatit tuniluuttut atuunneri, tarnikkut nappaatit, atornerluinerit imminortarnerillu.
Aaqqiissutissat eqqortut pissarsiarissagaanni ilisimasanillu misilittakkanillu paarlaateqatigiittarnissaq pillugu suleqatigiinnissaq peqqutissaqarluarpoq. Issittumi peqqissutsikkut immikkut ilisimasallit saqqummiussineranni kiisalu issittumi naalakkersuisut nunallu inuiisa kattuffiisa akornanni sinniisit ulloq ataaseq oqallisereerneranni tamanna paasinarsivoq.
Pingaartumik pitsaaliuinerup, ungasianit nakorsiartitsierup ilisimatusarnerullu tungaasigut issittumi nunat imminnut ilinniarfissaqarput. Tarnikkut nappaatinik katsorsaanermi, atornerluinermik imminortarnermillu pitsaaliuineq pillugu issittumi nunat misilittakkaminnik ilisimasaminnillu paarlaateqatigiinnissaq kissaatigaat taamallu piginnaanernik amerlanerusunik piorsaallutik.
Naalakkersuisut nuannaartut
Ataatsimiinneq »The Arctic Health Declaration«-imik atsioqatigiinnikkut naggaserneqarpoq, issittumi nunat peqqinnissakkut suleqatigiinnerunissamik siunertaannik ersersitsisoq.
Siunniussami issittumi nunat isumaqatigiipput nunat periutsit pitsaanerit pillugit paarlaateqatigiinneq iluaqutigisinnaagaat, peqqissutsimillu siuarsaanermi pitsaaliuinermilu ilisimatusarnermi Issittumi nunat inuii aallunneqarnerussasut.
- Ataatsimoorussamik aaqqiisarnissat siuarsarnissaat siunertaralugu Issittumi peqqissutsikkut qanimut oqaloqatigiinnissap suliniutigineqarnera nuannaarutigaara, peqqissutsimut naalakkersuisoq Agathe Fontain (IA) oqarpoq.
- Immitsinnut ilinniarfigisinnaavugut, neriunarporlu ataatsimiinneq manna uteqqiattussatut nutaatut aallarniutaasoq, nunami immini peqqissutsimullu tunngasuni ministeri Bertel Haarder (Venstre) oqarpoq.
»The Arctic Health Declaration« ukunani atuarneqarsinnaavoq; nanoq.gl aamma peqqik.gl.