Per B: 2009-mi akileraarutinik akitsuusinillu nutaanik pilersitsisoqassanngilaq
Isertitat pisissutaasinnaanerat ukiuni kingullermi apparpoq
Naak aningaasaqarnermut naalakkersuisup Per Berthelsenip Siumumeersup aningaasaqarnermut inatsimmi kisitsisit aappalaartorpassuit akiortussaagaluarlugit 2009-mi akileraarutit akitsuutillu qaffannianngilai.
Inatsisartut aningaasaqarnermut inatsisip inatsisartut ataatsimiittarfiani oqallisigimmassuk taamatut inuttaasunut neriorsuivoq.
Ukiup ataaserluinnaap matuma siorna aningaasaqarnermut naalakkersuisuusoq Aleqa Hammond, Siumut, toqunartulinnut akileraarutit qaffatsippai, taamanilumi cigarettit poortat aamma imigassap puiaasap akiisa inuaqatigiinni amerlanerpaanut sunniuttumik akisunerpaaffissartik tikippaat.
Aleqa Hammondip naatsorsuutigineqaraluarpaa landskarsimut 100 millionit qaffaatigititani tunngavigalugit isertitaqaatiginerunerussasut, kisianni akerlianit tubatorneq aamma imigassartorneq appariarput.
Taamaattumik Per Berthelsenip toqunartulinnut akileraarutinit isertitassamisut naatsorsuutigisani appartittariaqarpai, taakku 2009-mi 40 millionisut qaffasitsiginissaat kiisalu ukiut sisamat 2009-12 ingerlaneranni 195 millioninut naatsuutigineqarput.
- Siorna ukiakkut akitsuutit qaffanneqarnerisa kingorna kiisalu nerisassat nioqqutissiat akiissa qaffakkiartornerisa kingunerisaannik aningaasarsiat pisissutaasinnaanerisa apparnerat inuit inuuniarnerannut assut malunniussimavoq, Per Berthelsen oqarpoq.
- Taamaattumik maannakkut taamatut ittoqarnerani siunertaasinnaanngilaq pitsaasoq akileraarutinik imaluunniit assigisaannik qaffaaneq, tamatumami kinguneriinnassavaa aningaasarsiat pisissutaasinnaanerisa ajorseriaqqinnerat kiisalu aamma unammillersinnaanitta ajorseriarnera.
Nunatsinni pisiassat akii 1. juuli 2007-imit 1. juli 2008-mut 8,2 procentimit qaffapput.
- Imigassanut, cigarettinut kiisalu sukkunut akitsuutit 2007-mi qaffannerat ataatsimut isigalugu akit annertuumik qaffariarsimanerannut pissutaaqataalluinnerput, tassami nerisassat eqqarsaatigiinnarlugit taakku 10 procentingajammik qaffapput, Kalaallit Nunaanni Naatsorsuqqissaatarfik nalunaarpoq.
Aningaasaqarnermut ataatsimiititaliap nalilerpaa inuttaasut ilaasa amerlasuut aningaasarsiamik pisissutaasinnaanerisa procentinik tallimanik apparnerat malugiumaaraat.