Per B. aamma Per Stig naapissapput
CIA-p timmisartortarsimaneri, Thulemi qaartartorsuaq brintbombe kiisalu NATO-p ataatsimiissimanera qaangiuteqqammersoq, Naalakkersuisunut ilaasortap Per Berthelsenip qallunaat udenrigsministeriat Per Stig Møller siullerpaamik naapikkuniuk tamakkuupput oqaluuseriniakkat.
Ataatsimiinneq ingerlanneqassaaq februaarip 16-ianiit 19-ianut. Per Berthelsenip, Siumut, sivisuumik kissaatigisimasaa kiisami eqquutilerunarpoq.
Per Berthelsenip 2008-mi septembarimi Aningaasaqarnermut Nunanullu Allanut Naalakkersuisunngoramili kissaatigisimavaa udenrigsministerip Per Stig Møllerip, Konservative, naapinnissaa. Kisianni udenrigsministerip ataatsimiinnissamut ullorsiutaani tamanna ataatsimiinnissaq manna tikillugu inissaqarsimagunanngilaq.
Kalaallit Nunaata tungaaniit oqaloqatigiissutiginiarlugit kissaatigineqartut pingasuupput, Per Berthelsen Sermitsiaq.gl-imut ilisimatitsivoq. Pineqartut tassaapput CIA-p qulaassilluni timmisartuussisarsimanerata killiffia, Thulep eqqaani qaartartorsuarmik brintbombemik ajutoorneq. Kiisalu Islandimi NATO ataatsimiissimanera naammasseqqammersoq, Per Berthelsenip pakatsissutigeqisaanik Kalaallit Nunaanniit peqataaffigineqanngitsoq.
– Ataatsimiinnermut Kalaallit Nunaata toqqaannartumik aggeqqusissummik tigusaqarsimannginnera tupigusuutigalugu ilisimatitsissutigissavara, ataatsimiinnermimi ilaatigut eqqartorneqarput uagut imartatsinni annertunerusumik angalalernissaq, Per Berthelsen oqarpoq.
Naqissuserpaa annaassiniarnissamut SAR-imut (Search And Rescue, aaqq.) sillimaniarnerup annertusarneqarnissaanut ataatsimoortumik iliuuseqarnissaq qanoq pingaaruteqartiginera, taamaaliornikkut inuit aamma avatangiisip ajoquserneqarsinnaanerat pinngitsoortinniarlugu.
– Tamaani angalasarnerup annertusineqarniarnera akuersaartumik isigissagutsigu, taava sillimaniarneq annertusisariaqarpoq, Per Berthelsen oqarpoq.