Per B.-p aningaasaqarnermut inatsissaq nutaaq saqqummiuppaa
Naalakkersuisut sisamanngornermi aningaasaqarnermut naalakkersuisup Per Berthelsenip aappaagumut aningaasaqarnikkut inatsisissamut siunnersuutaa nutaaq tiguaat.
Siunnersuut naalakkersuisut tallimanngorpat aatsimiinnerminni oqaluuserissavaat, taamak Aningaasaqarnermut Nunanullu Allanut tunngasunut Naalakkersuisoqarfik ilisimatitsivoq. Tamatuma kingorna aatsaat siunnersuut tamanut saqqummiunneqassaaq.
KNRi naapertorlugu aningaasaqarnermut inatsisissaq Nukissiorfiit piginneqatigiiffinngortinneqarnissaannut naaggaluunniit pillugu suli assortuussutaasumik pingaarnertut imaqassaaq.
Naalakkersuisut maanna isumaqalerput kommunerujussuassat sisamaasut piginneqatigiiffimmi piginneqataassasut.
– Apeqqutip taassuma annertuup aaqqiivigineqarnissaa pingaaruteqarluinnarpoq. Nukissiorfiit aningaasalersuinikkut suliassai Nunatta Karsiata kisimiilluni kivissinnaanngilai, taamak Aningaasaqarnermut Naalakkersuisoq Per Berthelsen Siumumeersoq KNRimut oqarpoq.