Per B: Qinikkat taarserniarlik
Qinersisartut naalakkersuinikkut suliaqartunik saliinissaat pisariaqarpoq, innuttaasut aningaasaataannik naalakkersuinermik suliallit nuimasut atornerluinerat pillugu Per Berthelsen oqarpoq.
Neriuppunga qinersisartut pisarialimmik saliinissaminnut nukissaqartut. Inuit ataasiakkaat aningaasanik atornerluimmata pineqartoq imatut partiinut ataasiakkaanut attuumassuteqanngilaq, Per Berthelsen ag.gl-imut oqarpoq.
- Nunatta naleqquttunik politikkereqarneranut qinersisartut annertuumik akisussaapput. Arlaanni inuit ataasiakkaat eqqunngitsuliorsimappata taava akueriinnarlugit pissusissamisoortunngortittarparput. Inuit taakku qineqqittarnerisigut taamaaliortoqartarpoq. Uanga eqqartuussisutut inississanngilanga – tamanna qinersisartut akisussaaffigaat, Per Berthelsen oqarpoq.
Per Berthelsenip erseqqissarpaa nammineq inuttut isummani anikkamiuk – Siumut sinnernagu.
Ilaatigut JOnathan Motzfeldtip naalakkersuisuni inatsisartunilu siulittaasuugallarami atuisarnerujussui AG.p qulaajarpai, Per Berthelsenilu isumaqarpoq tamakku misissorneqarlutillu kinguneqartinneqartariaqartut.
- Soorunami. Pineqartumi arlaannaaluunniit qajassuunneqassanngilaq.
Politikerit allat aamma pineqarput. Josef Motzfeldt (IA) Ruth Heilmann (Siumut) aamma Hans Enoksen (Siumut) paasineqarput pisortat aningaasaataat atorlugit ilaquttatik kammalaatitillu nerersuaqatigisarlugillu, København-imi neriniartarfinni viinninik akisuunik pisisarlutik, nunaqarfimmi ukiortaami qaaqqusinernut qeqertaaqqamilu kiattuni sulilluni sapaatip akunneranik naanersiornernut.