atomimik ajutoornerit
Per Saramut: Piffissaanngitsukkut atom pillugu aperineq
Atomitalimmik ajutoortoqarsinnaanera pillugu apeqqut inatsisartut nunanut allanut sillimaniarnermullu ataatsimiititaliaata suliariniarunnaarallarpaa
Kalaallit Nunaat aamma Savalimmiut atomimik ajutoortoqarnerani ikioqatigiinnissamut nunat tamat isumaqatigiissutaata avataaniippoq. Tamanna inatsisartut nunanut allanut sillimaniarnermullu ataatsimiititialiaani suliarineqarnissaa unitsinneqarpoq apeqqut taannarpiaq pillugu IA-meersut Sara Olsvig paragraf 37 naapertorlugu apeqquteqareersoq.
Inatsisartut nunanut allanut sillimaniarnermullu ataatsimiititaliaani siulittaasup Per Berthelsenip Siumumeersup aamma IA-neersut Kuupik Kleist aamma Sara Olsvig isumaqatigiissimagaluarput ataatsimiititaliap misissussagaa sooq Kalaallit Nunaat Savalimmiulu atomimik ajutoortoqarnerani ikioqatigiinnissamut nunat tamat isumaqatigiissutaata avataaniinnersut. Tamatumali oqallisiginissaa unitsinneqarpoq sammisaq taannarpiaq pillugu Sara Olsvig paragraf 37 naapertorlugu Naalakkersuisunut apeqquteqaateqareersoq.
- Apeqqut taanna piffissaanngitsukkut qaqinneqartoq isumaqarpunga, Per Berthelsen Sermitsiaq.AG-mut oqarpoq.
Marloqiammik sulineq
Taassuma innersuuppaa Kuupik Kleistimut aamma Sara Olsvigimut isumaqatigiissusiarisimasani, maanna tassa atorunnaarsinneqartoq.
- Ataatsimiititaliami allatsi kalerrippara taassuma suliarinissaa unitsikkalaripput. Tassami marloqiusamik sulinerussaaq ataatsimiititaliami misissuigutta apeqqut taannarpiaq paragraf 37 naapertorlugu naalakkersuisunut ingerlatinneqareersoq. Ataatsimiititaliami sulineq paragraf 37 naapertorlugu apeqqummiit sukkanerusinnaasarpoq suliamut ilisimasallit aggersarneqarsinnaammata. Maanna pissutissaqarsoriunnaarpara tamatuma ataatsimiititaliami suliarinissaanut, Per Berthelsen oqarpoq.
Taassuma apeqqusinngilaa Sara Olsvig Inatsisartuni ilaasortatut paragraf 37 naapertorlugu apeqquteqarsinnaanera sunalu apeqqutiginiarnerlugu nammineq aalajangersinnaallugu.
- Isornartorsiuininni pivara sammisaq suliarineqartussatut isumaqatigiissutareersoq apeqquteqaateqarfigimmagu taamalu suliaq marloqiammik ingerlanneqalersillugu, Per Berthelsen.
Maanna taassuma allatut utaqqiinnalerpaa paragraf 37 naapertorlugu apeqqutip akineqarnissaa.
- Takoriartigu akissut qanoq ittoq tunniunneqassanersoq. Imaassinnaavormi ataatsimiititaliami suliareqqikkipput, Per Berthelsen oqarpoq.