Perip matusinissaq malugisimavaa
Apriilip 19-ianni Siumumeersup Per Berthelsenip naalakkersuisut aperai "Tûgdlik" matuneqarsimanersoq. Apriilip 20-ianni naalakkersuisut aalajangerput ulloq unnuarlu paaqqinnittarfik imminut pigisoq sivikitsumik piffissalerlugu matussasoq
- Meeqqanut inuusuttunullu ulloq unnuarlu paaqqinnittarfik "Tûgdlik", aamma Qooqquni immikkoortortaqartoq, tassanngaannaq matuneqarami?
Taamatut paragraf 37 malillugu apriilip 19-ianni naalakkersuisunut apeqquteqartoqarpoq. Apeqquteqartuuvoq Per Berthelsen, Siumut sinnerlugu Inatsisartunut ilaasortaq.
- Paasinneqarusuppunga meeqqat inuusuttullu, pissusilersornermikkut annertuunik ajornartorsiutillit, qanoq pineqarniarnersut, apeqqunni ilavaa.
Marlunngornermi apriilip 26-ianni ualingaatsiartoq tusagassiorfinnut naatsumik nalunaarutikkut Namminersorlutik Oqartussat allapput "Naalakkersuisut apriilip 20-ianni ataatsimiinnerminni aalajangertut umiarsuup umiartornermik ilinniutip ulloq unnuarlu ingerlanneqartup imminut pigisup "Tûgdlik"-ip ingerlatsinermut akuersissutaa 2011-mi maajip aallaqqaataanit atorunnaarsinneqassasoq. "Tamanna pivoq nakkutilliisut paasisimammassuk "pissutsit ernumanartoqartorujussuusut".