Periusissiami nutaami meeqqat peqataatinneqarnerunissaat qulakkeerneqassaaq

Meeqqat pisinnaatitaaffii pillugit sullissivimmi periusissiap nutaap, meeqqat inuusuttullu aalajangiinerni, inuunerannut sunniuteqaqataasussani, peqataatinneqarnerulernissaannik qulakkeerinninnissaq suliniutigissavaa.

- Tamatumani akuutitsineq oqaasiinnaanani timitalerneqarpoq meeqqat inuusuttullu pissutsit piviusut inuuffigisaat aallaavigalugit toqqaannartumik oqaloqatiginerisigut. Meeqqat inuusuttullu tusarnaarnissaat tamatumalu kingorna oqariartuutaasa politikerinut inersimasunullu allanut aalajangiisartunut ingerlateqqinnissaat ukkatarisimavavut, meeqqat pillugit oqaaseqartartoq Aviâja Egede Lynge oqarpoq.

Meeqqat pisinnaatitaaffii pillugit sullissivik Kalaallit Nunaanni meeqqat atugaat pillugit ukiuni arlalinni kingullerni qulaajaasimavoq.

- Ukiuni arfineq-pingasuni kingullerni MIO-p sulinera meeqqat atugaasa nakkutigineqarnissaannut tunnganeruvoq, tamatumanilu MIO-p angalanermi nalunaarusiai pingaarnertut nakkutiginninnermi sakkussatut atorneqarput. Ingerlatsinermik ukkatarinninnilluta sulivugut innuttaasunillu piviusumik akuutitsinissaq pingaartissimallutigu, Aviâja Egede Lynge oqarpoq.

Periutsit nutaat suliarineqassapput

MIO periusissiaqarnermini nutaami meeqqat inuusuttullu inuunerat pillugu paasisanik katersuinermi periutsinik nutaanik suliaqassaaq, taamaaliornikkut meeqqat atugaasa paasisaqarfigineqarnissaanut periutsit nukittorsarneqassallutik meeqqallu pisinnaatitaaffiisa ilisimaneqarnerat siammarterneqarnerussalluni.

MIO ilisimatitsivoq paasissutissat pigineqareersut tunngavigalugit meeqqat atugaasa pitsanngorsarneqarnissaat sulissutigissallugu pisariaqartoq.

- Ilisimasat taakku ilisimasanik allanik, meeqqat pisinnaatitaaffiinik pitsaanerusumik eqqortitsinissamut qulakkeerinninnissamut pisariaqartunik, ilaartorneqassapput. MIO ilisimasanik nakkutiginninnermilu sakkussanik ineriartortitsissaaq, aaqqiissuussaatitsissaaq ilaliisassallunilu taamaalilluni meeqqat tamarmik toqqissisimasumik pitsaasumillu inuuneqaleqqullugit aaqqiissutissat pitsaanerpaat pillugit uparuaasoqarlunilu siunnersuisoqarsinnaaniassammat, MIO allappoq.

Meeqqat pillugit oqaaseqartartoq oqarpoq:

- MIO piffissami tulliuttumi immikkut aallutaqalerpat imaanngilaq meeqqat inuusuttullu tusarnaarunnaassagigut. Taamaanngilluinnarpoq! Meeqqat inuusuttullu namminneq inuunertik pillugu immikkut ilisimasaqartuupput, periusissiamilu nutaanik ukkataqalernermi MIO-p meeqqat inuusuttullu sammisani aalajangiussanilu inuunerannut sunniuteqartuni akuutinneqarnerunissaat tunngavilersortassavaa.

MIO-p periusissiaa nutaaq MIO-p nittartagaani atuarsinnaavat.