Periusissiaq saqqummiunneqartoq: Kalaallit Nunaata illersornissamut isumannaallisaanermullu politikkia imaappoq
Nunanut allanut, isumannaallisaanermut illersornissamullu politikkimut periusissiaq siulleq piareerpoq. Nunatsinni Eqqissinermut Suliniarfimmik taaneqartartumik pilersitsinissaq anguniagaasoq, aamma Pituffimmi pissutsit pillugit allaffissornikkut sulisumik nunarput pilersitsissasoq ilaatigut tassani allassimavoq.
Naqqiut: Siusinnerusukkut allassimavoq periusissiaq taanna taama ittuni siullersaasoq, 2011-mili periusissiaq assingusoq saqqummiunneqarpoq.
Nunanut allanut, isumannaallisaanermut illersornissamullu politikki siulleq pingasunngorpat Namminersorlutik Oqartussani atsioqatigiinnermi saqqummiunneqarpat alloriarneq pingaarutilik pissaaq.
Periusissiaq taanna 2011-miilli siullersaalluni ukiuni arlalinni suliarineqarsimavoq. Kalaallit Nunaata suliassaqarfinni taakkunani nammineq periusissiornissaanut piffissanngortoq Naalakkersuisut tulleriiaartut oqariartuutigisarpaat, sivisuumillu isumaqatigiinniareernerup kingorna maanna angusaqarput.
Naleraq Inatsisartuni partiini kisiartaalluni periusissiamik atsioqataanngilaq.
Nunat tamalaat akornanni pissutsit ilungersunarnerujartormata ukiuni kingullerni isumannaallisaanermut illersornissamullu politikki sammineqangaatsiarsimavoq. Kalaallit Nunaata Nato-mik suleqateqartuarnissaa periusissiami erseqqissarneqarpoq:
- Silarsuarmi nalunartulimmi inuiaat inatsisaat, eqqisseqatigiinneq silarsuarmioqatigiillu eqqisseqatigiinnerat pissuserissaarnerallu aalajangiusimassavavut. Taamaammat isumannaallisaaneq illersornissarlu pillugit nunat ilaat allaanerusumik eqqarsartartut ingalassimaniartariaqarumaarpavut.
Eqqissinermut qitiusumik sullissivimmik kissaateqarneq
- Ilivut suleqativullu qaninnerpaat, Danmark kiisalu USA peqatigalugit sillimmartaarumalluta iliuuseqartariaqarpugut. Tassani aamma nunat sanilerisavut Island aamma Canadap suleqatiginissai pingaaruteqarpoq. NATO-mut ilaasortaasut tamarmik, periusissiami allassimavoq.
Eqqaaneqartutut sillimmartaartoqartariaqaraluartoq eqqissineq pingaartinneqarpoq — ilaatigut Nunatsinni Eqqissinermut Suliniarfimmik pilersitsinissaq anguniarneqarpoq:
- Kikkuussuserput tunngaviusumillu pingaartitavut suunersut puigussanngilavut. Taamaammat Issittumi eqqissineqarnissaa sammiumallugu Nunatsinni Eqqissinermut Suliniarfimmik Nunarput susassaqartut avataaneersut peqatigalugit pilersitsiniarpoq. Eqqissineq pillugu ilisimasat eqqissinissarlu anguniarlugu paaseqatigiinniarneq nukittorsarneqartariaqarput. periusissiami allassimavoq.
Immikkoortortap Pituffik nakkutigissavaa
Periusissiaq naapertorlugu Kalaallit Nunaat Danmarkimi USA-milu illersornissamut oqartussanik suleqateqarnerminik nangitsissaaq, pingaartumillu sakkutooqarnikkut illersuutit atortulersuutillu Nunatsinni pitsaanerpaamik inissisimanissaat pillugu suleqateqassalluni. aamma amerikamiut Pituffimmi sakkutooqarfiannik nakkutilliisumik immikkoortortamik pilersitsisoqassaaq:
- Pituffimmi pissutsit pillugit allaffissornikkut sulisumik nunarput pilersitsissaaq, taamaasilluni sakkutooqarfimmi pisunut nunatsinni aalajangiisartut pitsaanerusumik akuutinneqarnissaminnut periarfissaqalerseqqullugit.
Aamma Kalaallit Nunaata namminersulivinnissamik suliniuteqarnermi akisussaaffeqarnerulerusunnera periusissiami erseqqissarneqarpoq:
- Nunaqqatitta Siriusimut ilaannginnerat eqqartorsimaqisarput allanngortittariaqarparput taamaalilluta nunamik illersuineq ingerlassinnaassallugu. Nunatta nunatut akisussaaffinnik annerusunik tigusisinnaanngorluni nukittorsartariaqarpoq akisussaanerulerlunilu. Iluatsitsinerliornernut, ajutoornernut ajorniartunullu akiuussinnaanerulertariaqarpugut, periusissiami allassimavoq.
Ujaasinermi annaassiniarnermilu (SAR) akisussaaffiup annertusarnissaa namminerlu imartami aalisarnermik nakkutilliinermik sineriammilu nakkutilliinermik ineriartortitsinissaq politikerit aamma kissaatigaat.