Perlunnerani silaannakkut angallanneq unittoorluinnartoq
Anorersuarujussuarluni nittaattarnera pissutigalugu silaannakkut angallannerit arfininngornerup tungaanut kinguartinneqarput. Nuummi illoqarfimmi angallanneq aamma unammillernartoqarpoq, kommunillu aputaajaasui angummassinnaajunnaaqqapput.
Nuuk pingasunngormalli anorersuarluni perluppoq. Sisamanngornerup ullaassaani anorersuarunnaarmat nittaarujussuarpoq, Nuummilu innuttaasut makipput illoqarfik aputaannavissuusoq ingerlavissaanngitsorlu.
Angalasut 500-t missaat ippassaq kinguaattoorput. Air Greenland ullumi nalunaaruteqarpoq sineriak tamakkerlugu angallannerit sisamanngornermi silarlunnera pissutigalugu taamaatiinnarneqartut.
- Sisamanngornermi februarip ulluisa 10-anni silarlunnissaa peqqutaalluni timmisartuussinissat tamarmik unitsinneqarput. Kalaallit Nunaata kitaata annersaani Tunumilu anorip silallu pissusiata Air Greenlandip timmisartuutiminik qulimiguuliutiminillu angalatitsisinnaaneranut naliusut sinnerneqartussaapput, Air Greenland nittartakkamini allappoq.
Aqquserngit aputaajarneqarnerat angummanniarfigineqarpoq
Kommuneqarfik Sermersuumi aputaajaasut sisamanngornermi angummassinnaajunnaaqqapput. Aqqusinermi angallanneq eqqorneqarujussuarpoq, biilillu arlallit aqquserngup qeqqaannaani apussinerni marrissimasut arlaqarput.
- Aputaajaasut nivaleruttorput, nittaaginnavitsilluguli qaqugu angummassinnaalerumaarnersut oqaatigiuminaappoq. Nittaangaatsiarpoq, aqquserngillu annerit aputaajarnissaat maanna salliunneqarallarpoq. Pissutsit ilungersunarluinnarput, sulisummi arlallit coronamik tunillatsissimammata nivattussanik amigaateqartoqarpoq, Kommuneqarfik Sermersuumi attaveqatigiinnermik immikkoortortaqarfik ilisimatitsivoq.
Bussit uninngapput
Nittaannera aqqutigisallu ersarlulertarnera pissutigalugit Nuummi bussit angallassinitik tamaasa unitsippaat. Aqqusernillu ingerlavigiuminarsippata angallanneq nangeqqinneqarumaartoq ilisimatitsissutigalugu.
Kalaallit Nunaanni Politiini pigaartut ilisimatitsipput anorersuarnerani biilinik ajutoortut naatsorsuutigineqareersutut arlaqarsimasut.
- Aqqusinermi ajutoornerni qujanartumik inunnik ajoqusertoqanngilaq. Aqqusinermi angallattut silap qanoq innera malillugu sianiginissaat kaammattuutigaarput. Aqquserngit ilaat apussineqarsinnaapput marriffiusinnaasunik, ilaallu quasassinnaallutik, Bent Johnsen, Kalaallit Nunaata Politiivini pigaartut aqutsisuat oqarpoq.