Peroriartornermi innarlerneqarnerit isiginiarneqassapput
IMAK Kalaalllit Nunaanni sullivimmi tarnikkut avatangiisit nalilersuiffigineqarnissaannik ujartuivoq. Tamanna Naalakkersuisut ilinniartitsisunut perorsaasunullu, innarlerneqarnermik nalaataqarsimasunut, meeqqanut pimmatigineqarnermik eqqugaasimasumut pitsaanerusumik ikiuussinnaalernissaat siunertaralugu, oqaloqatiginninnermik ingerlataqarnissamik neqerooruteqarniarnerannut qisuariaatitut pivoq.
Ilinniartitsisut pædagogillu peroriartornerminni annersaanermik, innarlerneqarnermik imigassamik hashimillu atornerluinermik namminneerlutik naammattuuisimasut taamaammallu innarlerneqarsimanermik tunuliaquteqartut misigisinnaasarpaat innarlerneqarsimanertik ilinniagalittut isumaginnilluarsinnaasutut sulerusunnerminnut akornutaasartoq. Aviisi AG allappoq.
Taama Ilinniartitaanermut Aqutsisoqarfik nuna tamakkerlugu pimmatiginninneq akiorniarlugu periusissiami nutaami erseqqissaassuteqarpoq.
Ilinniartitsisut atuartuunermik nalaani namminneq pimmatiginninnermik nalaataqartarsimappata tamanna unammilligassanik aamma kinguneqarsinnaavoq.
- Innarlerneqarnerit ima isumaqarsinnaasarput, inersimasutut inuuneq artornartutut ajornartorsiornartutullu misigiffiusarluni, taamaammallu meeqqat ajornartorsiuteqartut paasinissaannut immikkullu soqutiginissaannut nukissaqartaratik, periusissiami allassimasoqarpoq.
Taamaattumik naalakkersuinikkut ikiorsiisoqalerpoq, ilinniartitsisut perorsaasullu tamarmik atuarfinni meeqqerivinnilu kulturimik »pimmatiginniffiunngitsumik«pilersitsiartuaarsinnaanissaat qulakkeerniarlugu.
Naalakkersuisut suliniutaanni pineqarpoq Isumaginninnermut Naalakkersuisoqarfik suleqatigalugu suliniutinik ineriartortitsisoqarnera, tamatumanilu ilinniagallit innarlerneqarnermik kingunerlutsitsisut meeqqat inuusuttullu sullinneqarneranni sulisuusut oqaloqateqartarnissaminnik neqeroorfigineqarlutik.
- Innarlerneqaatinik kingunerlutsitsinermik suliaq taanna immaqa ilinniagaqaqqinnerup nalaani ingerlanneqarsinnaassaaq, ilaatigut taama Ilinniartitaanermut Aqutsisoqarfik paasissutissiivoq.
Allaaserisaq tamaat uani AG-mi pissarsiarisinnaasanni atuaruk: