Perorsaasut isumaginninnermilu ikiortit allagartartaartinneqartut
SPS-imi tallimanngorneq 15. december nalliuttorsiorfiuvoq. Perorsaasunngortut aqqanillit, aamma isumaginninnermi ikiortinngortut 14-it ulloq taanna ilinniakkamik naammassinnissimanermut uppernarsaammik allagartartaartinneqarput.
Meeqqat paaqqinnittarfiini, ulloq unnuarlu angerlarsimaffinni sumiiffinnilu allani sulisussaaleqisoqartarpoq. Taamaammat isumaginninnermi ikiortit 14-it aamma isumaginninnermi perorsaasut aqqanillit ilinniakkaminnik naammassinnimmata nuannaartoqarpoq.
Ilulissani perorsaanermik ilinniarfiup tallimanngormat siuliani ilinniakkaminnik naammassinnittut katillugit 25-t allagartartaartippai.
- Ilinniarnerni taakkunani marlunni misiliutigalugu ilinniartitsissutigineqartut iluatsilluarput, ilinniakkaminnillu allagartaqalersut sulinermi unamminartut assigiinngitsorpassuit iliuuseqarfiginissaannut piginnaanngorsarluarsimapput, SPS tusagassiuutinut nalunaarummi allappoq.
Ilinniartitsisut tunniusimanerat ilisimasaminnillu tunniussilluarnerat SPS-imit qujassutigineqarput, taakkumi ilinniarnertuunngortut angusaqarluarnissaannut aalajangiisuupput. Ilinniakkaminnik naammassinnillutik allagartartaartut Ilulissani SPS-imi nalliuttorsiutigineqarput.