Persuttarneqartoq Danmarkiliaappaat
Angut 54-inik ukiulik ukiutoqqami Attumi persuttarnermi kingorna kiinnamigut innarlerujussuartoq Rigshospitaliliaappaat
Aasianni politiit suli iluamik paasinngilaat Attumi ukiutoqqami susoqarsimanersoq, angut 54-inik ukiulik peqqarniitsumik persuttarneqarsimaneranut atatillugu. Politiit persuttaanermik takunnissimasunik ujaasipput.
Angut 28-nik ukiulik ingerlaannaq nassuerpoq nammineq persuttaasuusimalluni, maannalu sakkortuumik persuttaasimasutut unnerluutigineqarpoq ulluni 14-ini tigummineqarallartussanngorluni.
- Persuttaaneq ukiutoqqami unnukkut erngunnerup kingorna pivoq, uppernarsaatissaqartinngilarpulli angut 54-inik ukiulik persuttaasorlu imeqatigiissimanersut aammalu qangarpiaq persuttaasoqarsimanersoq. Angut 54-inik ukiulik killisiorsinnaasimanngilarput kiinnamigut innarlerneqarujussuarnera pissutigalugu. Nakorsat naapertorlugit angutip allerua kiinaanilu sarngit arlallit napisimapput, Aasianni politiini ulluinnarni aqutsisoq Aqqaluk Petersen oqarpoq.
Angut 28-nik ukiulik politiinut nassuiaasimasoq nammineq angummik 54-inik ukiulimmik kiinaatigut arlaleriarluni tilluaasimalluni, politiilli taassuma oqaasii kisiisa tusaramikkit inunnik allanik persuttaanermik takunnissimasinnaasunik oqaloqateqarusullutik, pisoq qulakkeerniarlugu.
- Ukiortaami unnukkut Attuliarpugut angut 28-nik ukiulik tigusaralutigu. Silali ajormat takunnissimasinnaasunik oqaloqateqarnissatsinnut piffissaalatsivugut. Taamaattumik misissugassat pingaarnerit isumageriarlugit Aasiannut utipallattariaqarsimavugut, Aqqaluk Petersen Sermitsiaq.AG'mut oqarpoq.
Nakorsat naliliipput angutip persuttarneqarnermi kingorna inuunera ulorianartorsiortoq Dronning Ingridillu Napparsimavissuanut sapaammi ingerlanneqartariaqartoq, ataasinngornermili unnukkut Rigshospitalimut ingerlanneqaqqittoq. Politiit suli kalerrinneqanngillat angutip persuttarneqarsimasup qanoq inneranik.
Angut 28-nik ukiulik ataasinngornermi eqqartuussivimmut sassartinneqarpoq ullunillu 14-ini tigummineqarallassalluni.