nuan - atit
Peter Bjerregaard nersornaatisivoq
Ilisimatooq Peter Bjerregaard, Nunatsinni innuttaasut peqqissusaannik misissuisimasoq, nunani avannarlerni innuttaasut peqqissusaat pillugu nersornaaserneqarpoq
Issittumi peqqissuuneq pillugu ilisimatooq Peter Bjerregaard nunani avannarlerni innuttaasut peqqissusaat pillugu nersornaaserneqarpoq nunat inoqqaavi pillugu sulianiarluarsimasutut. Nersornaat svenskit isumaginninnermut ministeriannit Göran Hägglundimit Stockholmimi tunniunneqarpoq nunani avannarlerni peqqinnissamut isumaginninnermullu ministerit ataatsimiinnerat iluatsillugu.
Peter Bjerregaard Nunatsinni innuttaasut issittormiullu peqqissusaannik annertuumik misissuisarpoq. Nunatsinni peqqissuunissamik suliniutinik aamma ilusilersueqataasuuvoq. Suliai nunani avannarlerni maluginiarneqarput maannalu tassa Nordisk Rådip ataani nersornaammik tunineqarpoq.
B-52-ip nakkarnera
- Nordisk Ministerråd peqatigalugu assut tulluusimaarutigaarput Peter Bjerregaardip nersornaaserneqarmat tassami issittormiut peqqissusaat pillugu suliamigut peqqinnissaq pillugu nunani avannarlerni ilisimasanik naleqaqisunik qaffassaaqataasimagami, Nordic School of Public Healthimi rektori Marie Beckmann Suurküla oqarpoq.
Nunatsinni peqqissusannik misissuineq 2005-miit 2009-mut Peter Bjerregaardip ingerlappaa. Aamma avanersuarmiut peqqissusaat 2010-mi misissorpaa 1968-ip timmisartorsuup B-52-ip Thulep eqqaaani sakkussiarsuarnik atomitalinnik usilluni nakkarneranit sunniutaasut misissorneqarnerannut atatillugu.
Nersornaaserneqartullumi tulluusimaaqaluni nersornaat Stockholmimi tiguaa.
- Innuttaasut peqqissusaannik nersornaat aqqutigalugu nunani avannarlerni nunat inoqqaavisa peqqissusaat eqqumaffigineqarnerulerpoq. Issittumi inuusaatsimut kulturimullu naleqqussakkamik iliuuseqarnissaq pisariaqarpoq. Nunat avannarliit periarfissaqarluarput issittumi innuttaasut peqqissuunerisa qaffassarnissaanut naak tamanna nunani ataasiakkaani pingaartinneqarpianngikkaluartoq, professor Peter Bjerregaard oqarpoq.