Peter Olsen Kujataaniittoq: Ilinniarfiit naapisimaarneqarput
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq ulluni makkunani kujataaniippoq. Taanna akisussaaffigisamini paasisassarsiorluni ataatsimeeqaqattaarpoq, ilinniarfinnullu pulaartarluni. Siumut sinnerlugu Kujallermi kommunalbestyrelsimi ilaasortaq isumaqarpoq, Naalakkersuisut paasissutissiisarnerat amigartoq. Innuttaasummi Naalakkersuisut tikileraangasa ilisimatinneqarneq ajorput.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq ulluni makkunani kujataani ilinniarfiit paasisassarsiorfiginiarlugit kujataaniippoq. Peter Olsen ilinniarfiit assigiinngitsut pulaarsimalereerpai, taannalu erseqqissaavoq paasisassarsiorluni angalalluni, taamaammallu innuttaasunik ataatsimiisitsinaviarnani.
- Ilaatigut Campus Kujalleq, savaatilinngorniarfillu Upernaviarsummiittoq pulaarpakka. Taassuma saniatigut borgmesteri, atuarfeqarnermut, meeqqeriveqarnermut nutaaliornermullu ataatsimiititaliami siulittaasoq ataatsimeeqqatigisimallugit.
Qaammat ataatsip ingerlanerani Naalakkersuisut katillugit tallimat kujataaniipput. Siumut sinnerlugu kommunalbestyrelsimi ilaasortap, Margrethe Thårup Andersenip Naalakkersuisut kujataanut tikeraaraangasa innuttaasuniit arajutsineqartartut innuttaasullu paasitinneqarneq ajornerat ilaatigut Naalakkersuinut isornartorsiutigaa. Taassuma ilaatigut Ilinniartitaanermut Naalakkersuisoq innuttaasunik ataatsimiisitsissanersoq aperaa, innuttaasut Naalakkersuisup angalaneranik paasitinneqarniassammata.
- Paasisassarsiorlunga angalavunga, taamaammat innuttaasunik ataatsimiisitsisoqarnavianngilaq, Ilinniartitaanermut Naalakkersuisoq Sermitsiaq.AG-imut oqarpoq.
Taamaakkaluartorlu kommunalbestyrelsimi ilaasortap paasisinnaanngilaa, sooq naalakkersuisup angalalernera naalakkersuisut nittartagaaniluunniit paasissutissiisutigineqarsimanngitsoq. Innuttaasummi Naalakkersuisunut malinnaasinnaanerat pisariaqarsorineqarpoq.
- Kommune Kujallermi qinikkatut pisussanik arajutsinaveersaarnaqaaq, paasitinneqarnermi ajorpugut. Kujaani arlalinnik ilinniarfeqarpoq, taamaammat Ilinniartitaanermut Naalakkersuisoq kujataaniiinera innuttaasunut paasissutissiissutigineqarnissaa inissaminiiginnarpoq, Margrethe Thårup Andersen oqarpoq.
Angalanissaq januarimili aaqqissorneqarpoq
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq oqaatigaa, aatsaat massakkut paasisassarsiorluni angalasinnaanngorsimalluni. Qinersinerup kingorna corona angalanissanut ajornakusoortitsisimavoq.
- Kujataanut angalanissara januarimili aaqqissorneqalerpoq. Ulluni pingasuni maaniittussaavunga, tassanilu annermik ilinniarfiit ukkatarisussaallugit. Taamaammat angumerisinnaasakka ulluni pingasuni killeqartorujussuupput. Soorunami ajuusaarnarpoq ilai tusaaneqanngitsutut misigisimassappata, kisianni tassa una angalanera taamatut aaqqissugaavoq, Peter Olsen oqarpoq.
Taanna ullumikkut tallimanngornermi martsip 11-ani Narsamiittussaavoq. Tassani ulloq naallugu Inuilimi pulaasaaq. Campus Kujalleq, Upernaviarsullu ippassaq pulaarpai ilaatigullu borgmesteri atuarfeqarnermut, meeqqeriveqarnermut nutaaliornermullu ataatsimiititaliami siulittaasoq aamma ataatsimeeqatigalugit.
Peter Olsenip angalanissani sooq Naalakkersuisut nittartagaani allassimanngitsoq oqaaseqarfigisinnaanngilaa.