kommunet avinneqarnissaat
PI: Kommunet aggorneqarnerat nunatta tamarmi susassaraa
Kommunet nutaamik aggornissaat pillugu taasititsinissamut piffissaanngitsoq Partii Inuit isumaqarput
Tikkuussisumik Qaasuitsup Kommuniani innuttaasut kommunep avinneqarsinnaanera martsip 25-at taasissutigissavaat. Maanna kommunet aggorneqarsimanerat Partii Inuit akerleraat, taamaattorli isumaqarput nuna tamakkerlugu oqallinneq aqqusaaqqaarlugu taasisoqartariaqartoq isumaqarput.
Kommune aggornerat 2009-mi allanngortinneqarsimatsiaannartoq avannaani kommune angivallaarnerarlugu oqallinneq aallartippoq. Kommunep aveqqinneqarnissaani illersuisut isumaqarput najukkami demokrati sanngiilleriarsimasoq. Illersuisulli isumaqarput kommunep aveqqinneqarnissaanut isummernissamut siusippallaartoq.
Innuttaasut ikittuinnaat
Partii Inuit isumaqarput kommunet maanna aggorsimanerat aaqqiinerlunnerusoq, taamaattoq piffissaasorinngilaat tikkuussisumik nuna tamakkerlugu taasititsinissamut.
- Partii Inuit isumaqarpugut Qaasuitsup Kommuniani inuit ikittuararsuit kisimik aalajangingaannik allanngortitserinerit nanginneqassappata tamanna tulluartuunngitsoq, aammalu pipallatamik iliuuseqartoqassappat tamanna kusanassanngitsoq, Nikku Olsen nalunaarpoq.
Qaasuitsup Kommuniani innuttaasut tikkuussisumik martsip 25-at taasitinneqartussaapput.
- Inuiaqatigiit aaqqissuussanerat qanoq ittoq pilersinneqassanersoq eqqartorluarneqartariaqarpoq. Aammalu siunnersuutit ataasiartuinnaat aallaavigineqassanngittut isumaqarpugut, Nikku Olsen oqarpoq.
Kommunet aaqqissuussaanerat pillugu Partii Inuit politikkertik maanna ilusilersorpaat. Taakkulu isumaqarput kommunet aggorneqarsimanerat inuiaqatigiit tamarmiusut susassarigaat sukumiisumillu oqallisigineqaqqaartariaqartoq.