Piiaaffinnik ingerlatsinermut EU aningaasaliissuteqassanngilaq
Kalaallit Nunaanni piiaaffinnik ingerlatsienq Europa-parlamentip aningaasaliiffigisinnaanngilaa - akerlianik aatsitassat qaqutigoortut suleqatigiissutiginissaat ammatinneqarpoq
Suliniussuarnut inatsisip oqaluttuarisaanikkut pingaarutillip akuersissutigineqarnera Kalaallit Nunaata nuannaarutigileruttoraa EU Sermitsiaq.AG-mut oqarpoq Kalaallit Nunaanni aatsitassarsiorfinnik ingerlatsineq aningaasaliiffigineqarsinnaanagu.
- Nalunaarummi (siunertatut nalunaarummi 2012-imi juunip 13-imeersumi, aaqqiss.) allassimasutut illua'tungeriit nalunngilaat Kalaallit Nunaat aatsitassanik qaqutigoortunik EU-mut pilersuinissamut pingaaruteqarluarpoq, Europa-Kommissionip politikkikkut sulisua César Roa Sermitsiaq.AG-mut mail-ikkut akissummini allappoq, nangillunilu:
- Taamaattumik Kalaallit Nunaanni Aatsitassanut Pisortaqarfiup aamma Europa-Kommissionip suleqatigiinnerup tamassuma piviusunngortinnissaanut periarfissat misissorsimavaat. Eqqaasitsissutigineqassaaq aningaasaliisut namminersortut taarsernissaannut EU piginnaatitaanngimmat, taamaasillunilu aatsitassanik suliniutit tamakkua aningaasaliissuteqarfigisinnaanagit, César Roa allappoq.
Politikkikkut sulisoq aamma allappoq Kalaallit Nunaata EU-llu maanna suleqatigiissutigigaat ujarassiornermi paasissutissat, attaveqarnerup aningaasaliissuteqarnissamullu pisariaqartitsinerup misissorneqarnerat, piginnaasanik ineriartortitsineq aamma avatangiisinut tunngasut.
- Suliniutut EU-mit aningaasaliiffigineqarsinnaasut kalaallit aallartitaannut saqqummiunneqarput, César Roa allappoq.
- Illua'tungaatigut nalunaarutikkut siulittuutigineqarpoq soqutiginnittut allat aatsitassat pillugit oqaloqatigiinnermi akulerutsinneqarsinnaasut, César Roa mail-ikkut allappoq.