Piiaanissamik pilersaarutit kingunissai ersissutigaat
Greenland Minerals and Energyp 12,5 milliarder koruuninik aningaasaliissuteqarnissamik neqeroorutaa piiaanissami peqqissutsimut avatangiisinullu kinguneqaatissanut naapertuutinngilaq, Kommune Kujallermi IA isumaqarpoq.
Sulisartut piiaaffeqalissappat piiaaffimmi sulisussat atortussiassanik uranimik akulinnik piiaanermi peqqissutsikkut kinguneqaatinik kisimik malugisaqarnavianngillat. Aammattaaq innuttaasut pujoralannik ulorianartorsiortinneqarsinnaapput, qaarsoq annertdooq umiarsuarmik assartorneqassagaangat, IA isumaqarpoq.
– GME-p saqqummissinermini erloqinartoqartorujussuit eqqaanngilai, Inuit Ataqatigiit kommunalbestyrelsimi ilaasortaatitai sinnerlugit Lasse Davidsen allappoq.
IA sinnerlugu ilaasortat isumaqarput atortussiassanik qaqutigoortunik Kuannersuarni piiaaneq taqqavani inuussutissarsiornermut erloqinartunik kinguneqaateqassasoq.
– Savaatilinnut tuttuutilittullu inuussutissarsiuteqarneq, aalisarneq, takornariaqarneq imermillu tunisassiorneq tamarmik ajoquserneqassapput. Ukiuni 20-ni atortussiassanik piiaanikkut inuussutissarsiutit tamakkua atorunnaassapput, IA isumaqarpoq.
Partii isumaqarpoq GME-p neriorsuutaanik kusanartunik uukapaatinneqartoqartariaqanngitsoq.
– Akileraarutitigut isertitassaqapallalernikkut uukapaatinneqartariaqanngilagtut. Kujataani ulorianaateqanngitsunik allarpassuarnik atortussiassaqarpoq, tamakkualu samminiarneqarnerusariaqarput, Lasse Davidsen allappoq.